मङ्गलवार गौरीफण्टा नाकामा पाँच सय ३० जनाको एन्टीजेन परीक्षण गर्दा ६२ जनामा कोरोना सङ्क्रमण पुष्टि भएको थियो । एन्टीजेनमा कोरोना देखिएका व्यक्तिहरूलाई कैलालीको धनगढी उपमहानगरपालिकाले सञ्चालनमा ल्याएको आइसोलेसन सेन्टरमा राखिने गरेको छ ।
मङ्गलवार केटिएम दैनिकका संवाददाता उक्त आइसोलेसन सेन्टरमा पुग्दा ४४ जना मात्र रहेका थिए । सेन्टरमा निगरानीमा राखिएका व्यक्तिहरू क्षमताभन्दा बढी हुँदै गएपछि ‘होम आइसोलेसन’ मा राख्ने सर्तमा घरपरिवारको जिम्मा लगाइने गरेको जनाइएको छ ।
आइसोलेसन सेन्टरका फोकल पर्सन प्रेम रोकायाले भने ‘यहाँ दुई सय जनासम्मलाई राख्न सकिन्छ । तर, पछिल्लो समय भारतबाट स्वदेश फर्किरहेका व्यक्तिहरूमा एन्टीजेन परीक्षणमा कोरोना सङ्क्रमण देखिने क्रम बढेको छ । यसले गर्दा यहाँ धेरैलाई राख्न सकिँदैन ।’
स्वास्थ्य निर्देशनालयले भने एन्टीजेनमा कोरोना सङ्क्रमण देखिएकालाई अनिवार्य दश दिन आइसोलेसनमा राख्न निर्देशन दिए पनि स्थानीय तहहरूले आइसोलेसन सञ्चालन नगर्दा सङ्क्रमितहरू होम आइसोलेसनमा बाध्य भएका छन् ।
डोटीको जोरायल गाउँपालिका वडा नम्बर ५ का २७ वर्षीय युवा आइसोलेसन सेन्टरमा बसेका थिए । सोमबार भारतबाट फर्केका उनको नाकामा एन्टीजेन परीक्षण गर्दा कोरोना सङ्क्रमण पुष्टि भएको थियो । कोरोना पुष्टि भएपछि उनलाई आइसोलेसन सेन्टरमा राखिएको छ ।
उनले भने ‘मसँग गाडीमा ६० जना भारतबाट फर्केका थिए । नाकामा एन्टीजेन परीक्षण गर्दा हामी १५ जनामा कोरोना सङ्क्रमण पुष्टि भएको थियो । तर, अहिले यहाँ हामी चार जना मात्र छौँ ।’ उनले गाउँपालिकाले सोही ठाउँमा आइसोलेसन सञ्चालनमा ल्याएको भए आफ्नै गाउँको आइसोलेसनमा १० दिन बस्न तयार रहेको प्रतिक्रिया दिए ।
उनले आइसोलेसन सेन्टरमा राखिएका व्यक्तिहरूलाई आफन्तको जिम्मा लगाई छोडिनु उपयुक्त नभएको बताए । उनले भने– ‘कैलाली र कञ्चनपुरका नजिकका स्थानीय तहका व्यक्तिहरूलाई होम क्वारेनटाइनका नाममा छोडिन्छ । हामीलाई चाहिँ छोड्न मिल्दैन । तपाईँहरूको गाउँपालिकाबाट दबाब आउँछ भन्ने प्रतिक्रिया दिन्छन् ।’
उनले कोभिडबाट सबैलाई सुरक्षित राख्ने हो भने सबैलाई एउटै व्यवहार गर्नुपर्ने बताए । उनले भने– ‘कसैलाई चाही कैदी जसरी आइसोलेसनमा थुन्ने र कसैलाई तपाइको केही छैन घरमा सुरक्षित बस्नुस् भनेर पठाउनु उपयुक्त होइन। ’ उनले समुदायमा सङ्क्रमण फैलन नदिन क्षमता अनुसार कोरोना पुष्टि भएका व्यक्तिहरूलाई आइसोलेसनमा राख्नुपर्ने व्यवस्था मिलाउनुपर्ने बताए ।
अछामको मंगलसेन नगरपालिकाका ३५ वर्षीय युवा पनि आइसोलेसन सेन्टरमा तीन दिनदेखि बसिरहेका छन् । भारतबाट फर्कँदा नाकामा गरिएको एन्टीजेन परीक्षणमा कोरोना सङ्क्रमण पुष्टि भएपछि उनलाई आइसोलेसन सेन्टरमा राखिएको छ । उनले भने– ‘मसँग आइसोलेसनमा आएका व्यक्तिहरूलाई एकै दिनमा घर परिवारको जिम्मा लगाएर छोडियो तर, मलाई अहिलेसम्म छोडेको छैन । यो पनि राम्रै हो । मेरो घरपरिवार त सुरक्षित हुन्छन् ।’ उनले आफूलाई जस्तै एन्टीजेन परीक्षणमा कोरोना सङ्क्रमण देखिएकालाई पनि आइसोलेसनमा राख्न आग्रह गरे।
आइसोलेसन सेन्टरमा फोकल पर्सन प्रेम रोकायाले एन्टीजेनबाट कोरोना सङ्क्रमण देखिएका व्यक्तिहरूलाई चैत १७ गतेदेखि आइसोलेसन सेन्टरमा राख्न सुरु गरिएको बताए । उनले आइसोलेसन सेन्टरको क्षमता धेरै व्यक्ति राख्न नमिल्ने भएपछि घरपरिवारसँग होम आइसोलेसनमा राख्ने प्रतिबद्धता आएपछि पठाउने गरिएको बताए । उनले भने ‘सेन्टरमा आएका व्यक्तिहरूले आफन्त बोलाउँछन्। उनीहरूले होम आइसोलेसनमा राख्ने प्रतिबद्धता व्यक्त गरेपछि उनीहरूले रिर्जव गरी ल्याएको गाडीमा राखेर पठाउने गरेका छौँ ।’
उनले सेन्टरबाट गएका व्यक्तिहरू होम आइसोलेसनमा बसे नबसेको बारे जानकारी नलिइएको बताए । उनले भने –‘यहाँबाट गएपछि होम आइसोलेसनमा बस्छन्, बस्दैनन् हामीलाई थाहा छैन।’ आइसोलेसन सेन्टर सञ्चालनमा आएदेखि हालसम्म एक हजार ७९ जनालाई भर्ना गरिएकोमा एक हजार ३५ जनालाई परिवारको जिम्मा लगाई होम आइसोलेसनमा पठाइएको जानकारी दिए ।
उनले भने ‘सङ्क्रमितको सम्पर्कमा आएका व्यक्तिहरूको खोजी नगर्नु र सिधै होम आइसोलेसनमा पठाउँदा सङ्क्रमण समुदायमा फैलन सक्छ ।’