नेपाल पत्रकार महासंघको २६ औं महाधिवेशनमा नयाँ नेतृत्व चयनको लागि आज देशभर चुनाव भैरहेको छ ।
अध्यक्षसहित केही पदहरुमा स्वतन्त्र पत्रकारहरु चुनावी मैदानमा रहेका छन् भने विपुल पोखरेल र निर्मला शर्मा नेतृत्वको प्यानल चुनावमा होमिएको छ ।
महासंघको केन्द्रीय समिति, प्रदेश समिति, जिल्ला शाखा र विभिन्न प्रतिष्ठान तथा एसोसिएटमा नयाँ नेतृत्वका लागि १३ हजार १ सय २२ सदस्यले एकसाथ मतदान गर्दैछन् । बिहान ९ बजेदेखि साँझ ५ बजेसम्म मतदानको व्यवस्था गरिएको छ । मतदान सम्पन्न भएपश्चात बुधबार नै मतगणना शुरु गरिने छ । कुनै बाधा नभए चैत २६ गते सबै तहको मतपरिणाम आउने महासंघको केन्द्रीय निर्वाचन समितिका संयोजककपिल काफ्लेले केटिएम दैनिकलाई बताए ।
निर्वाचनका लागि ७७ जिल्लाको सम्बन्धित जिल्ला शाखामा, ४२ प्रतिष्ठानको विभिन्न १९ स्थानमा र १ एसोसियटको दशरथ रङ्गशालामा गरी कुल ९७ बुथमा निर्वाचन तोकिएको छ । केही शाखा र प्रतिष्ठानमा सर्वसम्मत रूपमा नयाँ नेतृत्व चयन भए पनि आज चैत २५ गते मात्रै निर्विरोध निर्वाचित भएको घोषणा गरिनेछ । यस निर्वाचनमा ३ हजारभन्दा बढी पदाधिकारी तथा सदस्य निर्वाचित हुने र त्यसमा महिलाको उपस्थिति ३३ प्रतिशतभन्दा बढी रहने संयोजक काफ्लेले बताएका छन् । महासङ्घका सबै संरचनामा पूर्ण समावेशिताको व्यवस्था गरिएको छ ।
नेपाल पत्रकार महासंघका देशैभरीका शाखाहरुमध्यै सबैभन्दा बढी सदस्य रहेको काठमाडौं शाखाको मतदान स्थल प्रज्ञा भवन कमलादी रहेको छ । केटिएम दैनिकका फोटो पत्रकारहरुले खिचेका केही तस्विरहरु