नेपाल कम्युनिस्ट पार्टीका अध्यक्ष तथा प्रधानमन्त्री केपी शर्मा ओलीले विगत २ दिनदेखि देशका विभिन्न स्थानमा गरेका भाषणमा उनको मनोविज्ञान झल्केको देखिन्छ ।
फाल्गुन १६ गते झापामा आफ्नो निर्वाचन क्षेत्रमा चाइना नेपाल फ्रेण्डसीप इन्डस्ट्रियल पार्कको शिलान्यास गर्दै ओलीले संसद पुनर्स्थापना चिन्ताको विषय नभएको बताएका थिए । कार्यक्रममा सम्बोधन गर्दा उनले भनेका थिए ‘पहिले पनि अविश्वास राखेर हटाएको हो, म जनताबाट फर्किएर आएको हुँ । फेरि हटाउन सक्नुभएछ भने जनताबाट दुई तिहाई लिएर आइदिन्छु ।’
आज फेरी झापाको विर्तामोडमा पूर्वाञ्चल क्यान्सर अस्पताल उद्घाटनको क्रममा उनले सोही कुरा दोहोर्याए । यसबाट ओलीले अविश्वासको प्रस्ताव सामना गर्न नसकेर फेरी प्रधानमन्त्री पद गुम्दा पनि आफू मानिसक रुपमा तयार भएको बुझिएको छ ।
ओलीले सकेसम्म आफूले विश्वासको मत प्राप्त गर्ने तर सो नभएमा पद छाड्न आफू मानिसक रुपमा तयार भैसकेको चर्चा हुन थालेको छ । स्वंय प्रधानमन्त्रीबाट आएका अभिव्यक्तिहरुले पनि चर्चा रहेको यस विषयमा घ्यू थप्न मदत गरेको छ ।
के प्रधानमन्त्रीको पद गुम्ला त ?
अब बस्ने प्रतिनिधि सभाको बैठकमा केपी ओलीप्रति संसदको विश्वास छैन भनी प्रस्ताव ल्याएर त्यो पास भएमा प्रधानमन्त्रीको पद गुम्छ ।
२७५ सदस्यीय संसदको बहुमत अर्थात् १३८ मत पाएमा मात्र त्यो प्रस्ताव पास हुन्छ। नेकपाको प्रचण्ड-नेपाल समूहले चाहेर मात्र त्यो प्रस्ताव पास हुन सक्ने स्थिति नहुनसक्छ। त्यसका लागि कांग्रेस वा जनता समाजवादी पार्टीको सहयोग आवश्यक हुन्छ।
हालसम्म पुष्पकमल दाहाल प्रचण्ड र माधवकुमार नेपालले नेतृत्व गरेको समूहमा झिनो बहुमत देखिएको छ । उक्त समूहमा अहिले ८८ जना सांसद खुलेका छन्। यस्तै, प्रधानमन्त्री केपी ओली नेतृत्वको समूहमा ८४ सांसद खुलेर आएका छन्। यो संख्या तलमाथि हुन सक्नेछ ।
ओली समूहबाट १६ जनासम्म सांसदलाई आफूतिर तान्न सकिने आकलन प्रचण्ड–नेपाल समूहको देखिन्छ । प्रचण्ड–नेपाल समूहबाट ५–७ जना सांसदलाई आफूतिर तानेर बहुमत पुर्याउने खेलमा ओली समूह छ ।
