सरकारले गरेको संसद् विघटन विरूद्ध आन्दोलन गरिरहेको बृहत् नागरिक आन्दोलनका अगुवा लेखक, पत्रकार तथा अभियन्ता नारायण वाग्लेले आफूले भन्दै नभनेको कुरा प्रचारमा ल्याइएको बताएका छन्।
बालुवाटारमा सोमबार भएको विरोध प्रदर्शनका क्रममा आफूले दिएको मन्तव्यलाई लिएर गलत प्रचार गरिएको बताएका छन् ।
सामाजिक सञ्जाल ट्विटरमा वाग्ले लेख्छन् ‘नागरिक आन्दोलनलाई विकर्षित गर्न यस्तो चाल सुरू भएको हो ।’
‘संविधानमा धर्म निरपेक्षता लेखिएको छ। त्यसैले मन्दिर बनाउने पूजा गर्ने काम बन्द हुनुपर्छ। धर्म निरपेक्षताका लागि मन्दिरहरू भत्काउनुपर्छ। पूजापाठ बन्द गर्नुपर्छ’ भनी ट्वीटरमा वाग्लेको फोटो राखेर प्रचारमा ल्याइएको छ।
मैले भन्दै नभनेको कुरा राखेर यसरी दुष्प्रचार गर्ने को हो? किन? नागरिक आन्दोलनलाई विकर्षित गर्न सुरू भएको यो चालबाट सावधान रहनु होला है! pic.twitter.com/TQwjhF84PO
— narayan wagle (@narayanwagle) January 26, 2021
वाग्लेले सो कुरा आफूले नबोलेको बताए र सोमबार उनले दिएको मन्तव्य पनि त्यस्तो छैन।
उनले भाषणमा भनेका थिए, ‘बालुवाटारमा बसेकोले पहिला देशभर मन्दिर बनाउँछु भन्दै हिँडे। अहिले पूजा आरती गर्दै हिँड्दैछन्। संविधानमा धर्मनिरपेक्षता लेखिएको तर ओलीले त्यही संघीयता र धर्मनिरपेक्षता खलबल्याउन चाहेका हुन्।’
