प्रधानमन्त्री केपी शर्मा ओलीले अर्का अध्यक्ष पुष्पकमल दाहाल प्रचण्डले बिगतमा पार्टीका विभिन्न व्यक्तिलाई लखेटेको लखेटेकै गरेको आरोप लगाएका छन् ।
प्रचण्डले आफ्नो राजनीतिक गुरु मोहन वैद्यलाई पनि त्यसैगरी लखेको आरोप लगाए ।
शनिबार काठमाडौंमा ओली समुहको प्रदेश १ भेलालाई सम्बोधन गर्दै प्रधानमन्त्री केपी शर्मा ओलीले प्रचण्ड जुन पार्टीमा गएपनि त्यहाँ भाँडभैलो हुने गरेको बताए ।
अध्यक्ष प्रचण्डले डाक्टर बाबुराम भटट्राईलाई पनि प्रयोग गर्नुसम्म गरेर अन्त्यमा लखेटेको प्रधानमन्त्री ओलीको भनाइ थियो । उनले प्रचण्डलाई खास ठाउँमा डा. लेखिएको व्यक्ति चाहिएको र पछि डा. लाई लखेटेको आरोप लगाए ।
प्रधानमन्त्री ओलीले अहिले डाक्टर मान्छेले धोती कुर्ता लगाएर हिडिरहेको भन्दै समेत व्यंग्य गरे । उनले भने, ‘प्रचण्डलाई त्यतिबेला डा. लेखिएको मान्छे चाहिएको रहेछ, डा.पनि खास ठाउँको, खुब प्रयोग गरेपछि विचरा डा. साब, अहिले त धोती कूर्ता लगाएर हिड्नुहुन्छ उहाँ।’
त्यस्तै प्रचण्डले विप्लवलाई भने जंगलतिर लखेटेको आरोप लगाए । तर आफूभने प्रचण्डसँग नहारेको प्रधानमन्त्री ओलीले जिकीर थियो ।
अर्को प्रसंगमा प्रधानमन्त्री केपी शर्मा ओलीले आफूले सर्वोच्च अदालतका न्यायाधीशहरुलाई नभेटेको दाबी गरेका छन्।
प्रधानमन्त्री ओलीले सपना प्रधान मल्लसहितका चार न्यायाधीशलाई पुस २६ र २७ गते बालुवाटारमा भेटेको समाचार सार्वजनिक भएको थियो। उक्त भेटलाई लिएर शुक्रबारको संवैधानिक इजलासमा निवेदकका तर्फबाट नेकपा नेतृ शशी श्रेष्ठले प्रश्न उठाएकी थिइन्।
यसबारे जवाफ दिँदै प्रधानमन्त्री ओलीले ती चार न्यायाधीशलाई आफूले यसपटकमात्र नभई कहिल्यै पनि नभेटेको बताएका हुन्।
उनले न्यायाधीशहरुलाई भेटेको प्रमाण देखाउनसमेत चुनौती दिएका छन् । “फलानो फलानो न्यायाधीश प्रधानमन्त्रीकहाँ भेट्न गए, यति बजेदेखि यतिबजेसम्म” यो भन्दा ठूलो झुठ, योभन्दा बढी बेइमानी के हुन सक्छ ? न्याय प्रणालीमाथिको जनताको विश्वास घटाउनका लागि न्यायप्रणालीमाथि यो गम्भीर प्रहार हो, यो भन्दा घिनलाग्दो के हुनसक्छ, ओलीले भने, उहाँहरु यो कुरालाई प्रमाणित गरेर देखाउन सक्नु हुन्छ ?
‘ती नाम गरेका न्यायाधीशलाई यसपटकमात्र होइन, सायद मैलै कहिल्यै भेटेको छैन’, उनले भने, सपना प्रधान मल्ललाई सर्वोच्चको न्यायाधधीश हुनुभन्दा अगाडि भेटेको थिएँ, देखेको थिएँ, कुनै कार्यक्रममा। व्यक्तिगत भेटघाट कहिल्यै पनि भएको छैन।’
