नेपाल इन्फ्रास्ट्रक्चर बैंकको साधारण सेयर (आईपीओ) मा पहिलो दिन करिब ४ अर्ब रुपैयाँ बराबरको आवेदन परेको छ ।
नेपाल इन्फ्रास्ट्रक्चर बैंक लिमिटेडले नेपालको पुँजीबजारको इतिहासमै सबैभन्दा ठूलोे ८ अर्ब बराबरको सार्वजनिक निष्काशन (आईपीओ) आजदेखि खुला गरेको हो ।
बैंकको सेयर निष्काशन तथा बिक्री प्रवन्धकको जिम्मा पाएको एनआईबीएल एस क्यापिटलका अनुसार शुक्रबार अपरान्हसम्म करिब ४ अर्ब रकम बराबरको आवेदन प्राप्त भइसकेको छ । शुक्रबार अबेरसम्म ३ करोड ८७ लाख ६४ हजार ३८० कित्ताका लागि ३ अर्ब ८७ करोड ६४ लाख ३८ हजार रुपैयाँको आवेदन प्राप्त भएको क्यापिटलले जनाएको छ ।
बैंकले ८ अर्ब रूपैयाँ बराबरको ८ करोड कित्ता सेयर प्रारम्भिक निष्कासनको बिक्री शुक्रबारबाट थालेको हो । ८ करोडमध्ये १ लाख ६० हजार कित्ता कर्मचारीका लागि र ४ लाख कित्ता म्यूचअल फण्डका लागि जानेछ ।
बाँकी ७ करोड ५८ लाख ४० हजार कित्ता साधारण शेयर भने सर्वसाधारणले खरिद गर्न सक्ने भएका छन् ।
सर्वसाधारणले १० देखि २ करोड कित्तासम्म आवदेन गर्न सक्ने भएका छन् । आवेदन दिन मिल्ने समय छिटोमा ६ माघ तोकिएको छ । उक्त अवधिसम्म तोकिए बराबर आवेदन नपरेमा भने पुनः समय थप हुन्छ ।
८ करोड कित्ताको यो आईपीओ अहिलेसम्मकै धेरै परिमाणको निष्काशन हो। आवेदनकर्ता सबैले आफ्नो आर्थिक अवस्थाअनुसार न्यूनतम १० कित्तादेखि अधिकतम २ करोड कित्तासम्मको आवेदन दिन सक्नेछन्। एक कित्ताको सय रुपैयाँ पर्नेछ। धितोपत्र बोर्डका अनुसार नेपालमा २१ लाख ३० हजारभन्दा बढी डिम्याट खाता खुलिसकेका छन्। अहिले यो संख्या झनै बढेको कारण यो कम्पनीको सेयरमा लगानीकर्ताले कम्तीमा पनि ५० कित्ताभन्दा बढीका लागि आवेदन भर्दा उपयुक्त हुनसक्छ।
जम्मा २० अर्ब चुक्ता पुँजी रहेको यस बैंकको १२ अर्ब संस्थापकहरुबाट चुक्ता भइसकेको छ भने बाँकी रकम यस निष्काशनबाट चुक्ता हुनेछ।
हाल पुँजी बजारको अवस्थालाई अध्ययन गर्दा यो सार्वजनिक निष्काशन (आईपीओ)का लागि आवेदन दिने सबै आवेदकहरुको हात खाली नहुने अनुमान गरिएको छ।
