आज बिहानदेखि सामाजिक सञ्जाल फेसबुक र ट्विटरमा एक तस्विर भाइरल भइरहेको छ ।
उच्च शिक्षा अध्ययन गर्ने विद्यार्थीहरुले विश्वविद्याललाई बुझाउनुपर्ने थेसिस वा पोजेक्ट वर्क डम्पिङ्ग साइटमा जस्तै देखिने स्थानमा फ्याँकिएको उक्त तस्विर विहानैदेखि भाइरल भैरहेको हो ।
नेपालको त्रिभुवन विश्वविद्यालयले लापरवाही गर्दै थेसिसहरुको वेवास्ता गर्दै भन्दै भाइरल भैरहेको उक्त तस्विरमाथि हामीले सत्यजाँच गर्ने प्रयास गरेका छौं ।
सुरुमा पूर्वसचिव भिम उपाध्यायले यस तस्विरलाई फेसबुकमा राख्दै लेखेका थिए ।
त्रिवि किर्तिपुरमा विद्यार्थीले बुझाइएका हजारौं थेसिसहरु यसरी कबाडी सरह फ्याँकिएका छन् । पछि भने उनले आफ्नो उक्त स्टाटस सच्चाउँदै लेखेका छन् । “यो थेसिसको डुंगुर यसरी डम्प भएको भनिएको नाईजेरियामा रहेछ, नेपालको हैन। श्रोतलाई भ्रम परेर यस्तो फोटो पठाईदिनु भएको छ र यो त अति लापरवाही भएछ र सतर्क हुनपर्यो भन्ने मनसायले मैले पोष्ट गरेकोमा गल्ति हुन पुगेकोले क्षमाप्रार्थी छु। मलाई यसको प्रमाण पठाईदिनुहुने शुभेच्छुकप्रति आभार ब्यक्त गर्दछु। तर नेपालका विश्वविद्यालयहरूले पनि यस्ता कुरामा चनाखो रहनैपर्छ।”
फेसबुकमा लगभग साढे १० हजार फ्यान (पाँच हजार साथी र साढे पाँच हजार फ्लोअर्स) भएका पत्रकार भानुभक्त आचार्यले उक्त तस्विरलाई भाइरल बनाउन सहयोग गरेका हुन् ।
हुनत पत्रकार आचार्यले कहिपनि त्रिभुवन विश्वविद्यालयका थेसिस भनेर किटानी नगरेतापनि उनले घुमाउरो पारामा उक्त तस्विरलाई त्रिभुवन विश्वविद्यालयसँग जोडेका छन् । फेसबुकमा उनी लेख्छन्
“हाम्रा थेसिसको यो हरिबिजोग ।
हाम्रो बौद्धिक क्षमताको सत्यनाश ???।
नोट: मैले केही वर्षअघि त्रिवि केन्द्रीय पुस्तकालय पछाडि च्यातिएका, धमिराले खाएका, पानीले भिजेर ढाडिएका, कुहिँदै गरेका र कमिलाहरुको गुँढ भएका थेसिसहरुको रास देखेको थिएँ ।
अहिले थिति सप्रिएको भए छुट्टै कुरा । नत्र, थेसिस लेख्नै नपर्ने प्रधानमन्त्रीहरुले पाटीको कार्यकर्ता नियुक्त गर्ने निकायमा यस्तो हुनु कुनै ठूलो कुरा होइन । ”
यो समाचार तयार पार्दासम्म उनको उक्त स्टाटस ७६ जनाले शेयर गरिसकेका छन् । ट्विटरमा सरोज श्री नाम गरेको ह्यान्डलबाट पनि उक्त तस्विर शेयर भएको पाइएको छ ।
यो तस्विरको रिभर्स इमेज सर्च गर्दा उक्त तस्विर नेपालको नभएको भेटिएको हो ।
सन् २०१६ को मे १२ मा एक ब्लगमा राखिएको एक जानकारी अनुसार उक्त थेसिसहरु नाइजेरियाको ‘युनिभर्सिटी अफ कालावर’ का हुन् ।
यही तस्विरलाई भारतको विश्वविद्यालयको तस्विर भन्दै एक फेसबुक पेजबाट सेप्टेम्बर ६ २०१८ मा अपलोड भएको देखिन्छ । त्यो तस्विरलाई उक्त पेजबाट ७० हजार भन्दा बढिले शेयर गरेका थिए ।