प्रधानमन्त्री एवं नेकपा अध्यक्ष केपी शर्मा ओलीले अथक प्रयास गर्दा पनि स्थायी समिटि बैठक रोक्न सकेनन् । सचिवालय बैठक टार्दै आए पनि स्थायी समिति पनि नबसाल्ने ओलीको मनसाय थियो । तर त्यो सफल हुन सकेन । अन्ततः अर्का अध्यक्ष पुष्पकमल दाहालले स्थायी समिति आह्वान गरेका छन् । यसले प्रधानमन्त्री ओलीलाई अर्को धक्का लागेको छ । भदौ २६ गतेको स्थायी कमिटी निर्णय प्रधानमन्त्री ओलीको पक्षमा हुँदाहुँदै पनि त्यसको कार्यान्वयनमा देखिएको समस्याले एकपछि अर्को धक्का लागेको हो ।
शनिबारको सचिवालय बैठकले दुवै अध्यक्षका राजनीतिक प्रस्ताव स्थायी कमिटीमा लैजाने निर्णय गरेको छ । तर ओलीले यो विषयमा आपत्ति जनाएका थिए ।
प्रधानमन्त्री ओलीले शनिबारको बैठकमा आफूलाई बहुमतले घेराबन्दी गरेको आरोप लगाएका थिए । दुवै अध्यक्षका प्रस्ताव स्थायी कमिटीमा प्रस्तुत हुँदा विवाद सुल्झाउने जिम्मा पनि सोही कमिटीमा पुग्नेछ । स्थायी कमिटीमा दाहाल–नेपाल समूहमा स्पष्ट बहुमत पुग्ने देखिए पनि केही नेताले मध्यमार्गी भूमिका खेल्न सक्ने भएकाले दुवै अध्यक्षको प्रस्ताव अस्वीकृत गरी नयाँ दस्तावेज बनाउने सम्भावना पनि बलियो छ ।
स्थायी कमिटी सदस्यहरु आफूतिर तान्न दुवै पक्ष तीब्र कसरतमा छन् । ४५ सदस्यीय स्थायी कमिटीमा पूर्वमाओवादीका अग्निप्रसाद सापकोटा सभामुख भएपछि ४४ सदस्यीय भएको हो । स्थायी कमिटीमा ओली समूहका १२ जना छन् । पछिल्लो समय पूर्वमाओवादीका पाँच स्थायी कमिटी सदस्यहरु पनि ओली समूहमा लागेको दाबी गरिएको छ । ओली समूहमा उनीहरु खुलेर लागे भने ओलीतिर १७ जना स्थायी कमिटी सदस्य पुग्छन् ।
त्यस्तै दाहाल समूहमा सुरुमा १८ सदस्य थिए । जसमध्य पाँच जना ओली समूहमा लागेको दाबी गरिएको छ । त्यसो हो भने दाहाल समूहमा १३ सदस्य बाँकी रहनेछन् । त्यस्तै माधव नेपाल, वामदेव गौतम र झलनाथ खनाल समूहका स्थायी कमिटी सदस्यहरु १४ जना छन् ।
सचिवालयमा दाहाल नेपाल समूहको बहुमत रहेको थाहा पाएका ओलीले बैठक टार्दै आए । सचिवालयले कुनै निर्णय पनि गर्न सकेन । अब स्थायी समितिमा पनि सोही समूहको स्पष्ट बहुमत छ । यसलाई पनि टार्ने मनसायमा ओली छन । स्थायी समिति बैठकले कुनै निर्णय गरिहाले पनि आफूलाइृ मान्य नहुने खुल्ला रुपमा बताउँदै आएका छन् । आइतबारको बैठकमा पनि ओली गएनन् । स्थायी समितिपछि नेकपाले केन्द्रीय समिति बैठक समेत आह्वान गरेको छ ।
यस्तो छ स्थायी कमिटीको गणित
ओली समूह (१३ जना)
केपी शर्मा ओली
ईश्वर पोखरेल
विष्णु पौडेल
छविलाल विश्वकर्मा
किरण गुरूङ
प्रदीप ज्ञवाली
पृथ्वी सुब्बा गुरूङ
शङ्कर पोखरेल
सत्यनारायण मण्डल
रघुवीर महासेठ
लेखराज भट्ट
सुवास नेम्वाङ
विष्णु रिमाल
प्रचण्ड समूह (१७ जना)
पुष्पकमल दाहाल प्रचण्ड
रामबहादुर थापा (पछिल्लो समय ओली समूहमा देखिएका)
नारायणकाजी श्रेष्ठ
वर्षमान पुन
जनार्दन शर्मा
गणेश साह
गिरिराजमणि पोखरेल
चक्रपाणि खनाल
टोपबहादुर रायमाझी (पछिल्लो समय ओली समूहमा देखिएका)
देवेन्द्र पौडेल
हरिबोल गजुरेल (पछिल्लो समय ओली समूहमा देखिएका)
मणिचन्द्र थापा (पछिल्लो समय ओली समूहमा देखिएका)
देव गुरूङ
पम्फा भुसाल
मातृका यादव
लिलामणि पोखरेल
शक्तिबहादुर बस्नेत
नेपाल समूह (१४ जना)
माधवकुमार नेपाल
अष्टलक्ष्मी शाक्य
भीम रावल
सुरेन्द्र पाण्डे
गोकर्णराज विष्ट
घनश्याम भुसाल
योगेश भट्टराई
मुकुन्द न्यौपाने
युवराज ज्ञवाली
रघुजी पन्त
भीमप्रसाद आचार्य
बेदुराम भुसाल
झलनाथ खनाल
वामदेव गौतम