नेपाल कम्युनिष्ट पार्टी नेकपाकी नेतृ अष्टलक्ष्मी शाक्यले राष्ट्रपतिले नेकपाको आन्तरिक मामिलामा हस्तक्षेप गर्न नहुने बताएकी छन्।
शुक्रबार थापाथली इन्जिनियरिङ क्याम्पसमा आयोजित प्रचण्ड-नेपाल समूहको विद्यार्थीहरूको भेलामा नेतृ शाक्यले यस्तो बताएकी हुन्।
उनले भनिन्, ‘पार्टीको आन्तरिक मामिलामा राष्ट्रपतिले हस्तक्षेप गर्नु हुँदैन, पछिल्लो समय राष्ट्रपतिको भूमिका सक्रिय हुँदै गएका छ।’
प्रधानमन्त्री केपी शर्मा ओलीलगायतका नेताहरूले पार्टीमा विवाद बढेपछि राष्ट्रपति विद्यादेवी भण्डारीसँग भेटघाट बाक्लो पार्ने गरेका छन्। यसअघि पनि अध्यक्षद्वय केपी शर्मा ओली र पुष्पकमल दाहाल प्रचण्डले राष्ट्रपतिलाई साक्षी राखेर भेट गरेका थिए।
यस्तै, प्रधानमन्त्री केपी शर्मा ओलीलाई बैठकमा उपस्थित भएर छलफलमा भाग लिन उनले आग्रह गरिन्। समस्याको निकास पनि बैठकले नै दिने बताइन्। उनले प्रधानमन्त्री ओलीमा लोकतान्त्रिक चरित्र नरहेकोसमेत आरोप लगाइन्। बैठक नै समस्या समाधानको थलो भएकाले त्यहाँ आएका विचारलाई सम्मान गर्दै पार्टी एकता गर्ने नेता पनि भएकाले ओलीले नै भूमिका खेल्नुपर्ने बताइन्।
अबका पार्टीका बैठकहरूमा अध्यक्ष ओली सहभागी नभएपनि बैठकहरूलाई अघि बढाइनुपर्ने उनको भनाइ छ।