सरकारले १८ दिनदेखि अनसनरत डा गोविन्द केसीलाई अनसन फिर्ता लिन आग्रह गरेको छ।
बिहीबार मन्त्रिपरिषद् बैठकका निर्णय सार्वजनिक गर्ने क्रममा सरकारका प्रवक्ता प्रदीप ज्ञवालीले डा केसीलाई अनसन फिर्ता लिन आग्रह गरेका हुन्।
मन्त्री ज्ञवालीले भने- ‘देश संकटमा छ। कोरोना विरुद्धको लडाइमा जुधिरहेका धेरैलाई हामीले गुमाएका पनि छौं। यस्तो बेला अनसन र हडताल राम्रो विषय भएन। अरु मागमा पछि पनि छलफल गर्न सकिन्छ। सरकार डा केसीलाई अनसन फिर्ता लिन आग्रह गर्छ।’
चिकित्सा क्षेत्र सुधारका विभिन्न माग राखेर डाक्टर गोविन्द केसी अनशन बस्न थालेको ८ वर्ष भयो। ८ वर्षको अवधिमा केसी अहिले १९ औं पटकको अनशनमा छन्। हरेक अनशनमा डा केसीलाई कुनै न कुनै दल या समूहको ‘ट्याग’ लगाउनेहरु सक्रिय हुन्छन्। र, हरेक दल सरकारमा पुगेपछि गोविन्द केसीलाई सत्रुशक्तिका रुपमा बुझ्न थाल्छ।
केसीको पहिलो अनशन थियो – २०६९ असार २१ गतेदेखि। पहिलो अनशन ५ दिनमा नै सकियो। ४ बुँदे माग राखेका केसीको प्रमुख माग त्रिविको हस्तक्षेपबाट आइओएम’लाई मुक्त गर भन्ने थियो।
अहिले उनी १९ औं अनसन बसिरहेका छन् । जुम्लामा अनसन सुरु गरेका केसीलाई स्वास्थ्यमा समस्या देखिएपछि सरकारले नेपालगन्ज हुँदै काठमाडौं ल्याएको छ ।
हिजो (बुधबार) पूर्वप्रधानमन्त्री तथा जनता समाजवादी नेपालका नेता डा. बाबुराम भट्टराईले अनसनरत् डाक्टर गोविन्द केसीलाई भेटेका छन् । टिचिङ अस्पतालमा अनसनरत् डाक्टर केसीलाई भेट्न पत्नी हिसिला र उनी पुगेका थिए । विभिन्न सञ्चारमाध्यममा डाक्टर केसीको अवस्था नाजुक बन्दै गइरहेको र उनी हात हल्लाउन समेत नसक्ने समाचार सार्वजनिक भैरहँदा भट्टराईलाई केसीले दुवै हात उठाएर नमस्कार गरेको तस्विर सार्वजनिक भएको छ ।