नेपाली काँग्रेसका महामन्त्री डा. शशाङ्क कोइरालाले आफू दुई तीन दिनमा नै अस्पतालबाट डिस्चार्ज हुने बताएका छन् ।
आज एक भिडियो सन्देश जारी गर्दै उनले अहिले आफू ओम अस्पतालको सघन उपचार कक्ष (आइसियु)मा उपचार गरिरहेको र चाँडै नै निको भएर घर फर्किने बताएका हुन् ।
“मेरो चिन्ता गर्नुपर्दैन, दुई तीन दिन अस्पताल बसेर म डिस्चार्ज हुन्छ”, कोइरालाले भिडियो सन्देशमा भनेका छन् ।
कोरोना भाइरस (कोभिड १९)को संक्रमण देखिएपछि उनी मङ्गलबार अस्पताल भर्ना भएका हुन् ।
सुरुमा घरमै आइसोलेसनमा बसेका कोइरालालाई ज्वरो बढेपछि ओम अस्पतालको सघन उपचार कक्ष (आइसियु) मा राखेर उपचार भइरहेको अस्पतालका प्रवन्ध सञ्चालक बाबुकाजी कार्कीले बताए ।
महामन्त्री डा. कोइरालाको स्वास्थ्य अवस्थाबारे भ्रामक कुरा आएपछि अस्पतालले उनको भिडियो सन्देश जारी गरेको हो ।
उनलाई भदौ २३ गते कोरोना संक्रमण पुष्टि भएको थियो । शरिरमा उच्च ज्वरो आएपछि कोइराला भाद्र ३१ गते ओम अस्पतालमा भर्ना भएका थिए ।
भिडियो सन्देश
