प्रदेश १ का सामाजिक विकासमन्त्री जीवन घिमिरेलाई कोरोना संक्रमण देखिएको छ ।
प्रदेश प्रयोगशाला विराटनगरमा सोमबार साँझ गरिएको परीक्षणमा मन्त्री घिमिरेलाई संक्रमण पुष्टि भएको हो । भदौ १३ गते धनकुटा अस्पतालको निरीक्षणमा गएर फर्किएपछि उनलाई झाडापखाला भएको थियो । सोमबारदेखि ज्वरो पनि आएको मन्त्री घिमिरेको सचिवालयले जनाएको छ ।
शनिबार साझदेखि घिमिरे निवासमै बसिरहेका छन् । मन्त्री घिमिरेले आफ्नो स्वास्थ अवस्था सामान्य रहेको जानकारी दिएका छन् ।
आज काठमाडौं महानगरका मेयर विद्यासुन्दर शाक्यलाई पनि कोरोना संक्रमण भएको छ भने डाक्टर भोला रिजाल दम्पती पनि कोरोना संक्रमित भएका छन् ।
दैनिक कोरोनाको ग्राफ बढ्न थालेपछि पत्रकार ज्ञानमणि नेपाल कालोटोपी फेसबुकमा लेख्छन् “कोरोनाले वरिपरि घेरि सक्यो , कति बेला कसलाई समात्छ थाह छैन । न धनि , न गरिब , कसैलाई बाँकी राखेको छैन । शुक्रबार विनोद चौधरीलाई समाएको कोरोना आज काठमाडौंका मेयर, डाक्टर भोला रिजाल लगायतलाई लागेको छ । कतिबेला कसलाई लाग्छ पत्ता छैन । हिजो नेपालमा दोस्रो संक्रमित देखिएपछि सरकारले लकडाउन गर्यो । आज ४० हजार संक्रमित हुँदा पनि सामान्य जस्तै छ । मृत्युको ग्राफ पनि दैनिकरुपमा उकालो लागेको छ । सरकारले नै भनिसक्यो अब सरकारले उपचार गर्न सक्दैन । आफैं ख्याल गर्नु । कसरी जोगिने र कसरी जोगाउने आफैं ख्याल गर्नु होला ।”