वीपी कोइराला स्वास्थ्य विज्ञान प्रतिष्ठानको जनरल आइसियुमा उपचाररत एक विरामीमा कोरोना संक्रमण पुष्टि भएपछि असुरक्षित भएको भन्दै त्यहाँ कार्यरत नर्स र अन्य विरामीका कुरुवाहरु आन्दोलित भएका छन् ।
संक्रमण पुष्टि भएका विरामीको उपचारमा संलग्न डाक्टरहरुलाई क्वारेन्टिनमा राखिए पनि आफुहरुलाई वेवास्ता गरिएको, मास्क र पञ्जासमेत पर्याप्त मात्रामा उपलब्ध नभएको भन्दै आइसियुका नर्सहरु प्रशासनमा धर्नामा बसेका छन् । उनीहरुले शंकास्पद विरामीलाई आइसियुमा ल्याएर स्वास्थ्यकर्मी र अन्य विरामीहरुको स्वास्थ्यमाथि खेलवाड गरिएको पनि गुनासो गरेका छन् ।
आज प्रतिष्ठानको आईसियुमा उपचाररत एक विरामीमा संक्रमण देखिए पश्चात उपचारमा खटिएका नर्सहरुलाई क्वारेन्टिनमा नपठाएको र डिउटीमा खटाउदा समेत पीपीइ, पञ्जा र मास्क उपलब्ध नगराएको भन्दै उनीहरुले आन्दोलन गरेका हुन् ।
अन्य विरामीको कुरुवा भन्छन्,’संक्रमण फैलिए जिम्मेवारी कस्ले लिने ?’
आइसियुमा उपचाररत अन्य विरामीका आफन्तहरुले पनि स्टाफ नर्सहरुको आन्दोलनलाई समर्थन जनाउदै धर्नामा बसेका छन् । उनीहरुले पनि आइसियुमा पिसिआर रिपोर्ट नआई संक्रमितहरुलाई राखेर अन्य विरामीहरुलाई संक्रमणको जोखिममा पारेको बताएका छन् । ‘मेरो आमा २ नम्बर बेडमा हुनुहुन्छ, राती १ नम्बर बेडको विरामी पोजेटिभ रिपोर्ट आएछ,’धरानी जशोदा लिम्बुले भनिन्,‘हाम्रो आमा बुबालाई केही भयो भने जिम्मेवारी कस्ले लिन्छ ?’
काठमाडौंमा पनि समस्या
काठमाडौंको एक अस्पतालमा कार्यरत चिकित्सकले सरकारले कोरोना संक्रमितको उपचारमा खटिने स्वास्थ्यकर्मीलाई भत्ता दिने बताएपनि अहिलेसम्म आफू कार्यरत रहेको अस्पतालमा कसैले पनि भत्ता नपाएको गुनासो गरेका छन् । उनले भत्ताको त कुरै छाँडौं अहिलेसम्म पीपीइ पनि पाइएको छैन मास्क पनि आफैले किनेर लगाएको बताएका हुन् ।
उनले सामाजिक सञ्जाल ट्विटरमा उल्लेख गरेको उक्त कुरालाई अहिले धेरै समाजिक संजाल प्रयोगकर्ताले आ आफ्नो वालमा शेयर गरिरहेका छन् ।
सरकारले कोरोना उपचारको लागि भन्दै १२ अर्ब खर्च गरेको बताइरहँदा स्वास्थ्यकर्मीले पीपीइ र मास्क पनि पाउन सकिरहेका छैनन् ।
केही समयअगाडी धनुषामा कार्यरत एक नर्सले “सरकार भत्ता हैन सुरक्षाको उपकरण देउ !!” शीर्षकमा ब्लग नै लेखेकि थिइन्
