सरकारले कालापानी, लिपुलेक, लिम्पियाधुरासहितको राजनीतिक तथा प्रशासनिक रुपमा जारी गरेको नेपालको नयाँ नक्सा अन्तर्राष्ट्रिय समुदायमा पठाउने तयारी गरेको छ ।
यसका लागि सरकारले अन्तर्राष्ट्रिय समुदायलगायत युनाइटेड नेशन (युएनओ) र गुगलमा समेत प्रकाशित हुने गरी तयारी गरेको भूमि, व्यवस्था तथा गरिबी मन्त्री पद्मा अर्यालले जानकारी दिइन् । गुगल म्यापमा अझैपनि नेपालको पुरानै नक्शा देखिन्छ । गुगलमा नेपाल भनेर सर्च गर्दा आउने पहिलो नतिजा वीकिपिडियामा भने नेपालको भूभाग १ लाख ४७ हजार ५ सय १७ बर्ग किमी लेखेको देखिन्छ । जुन नयाँ नक्शामा थप भएको भूभागसमेत जोडेर राखिएको हो ।
अर्याल भन्छिन्, ‘हामी चाँडै नै नेपालको नयाँ नक्सा (कालापानी, लिपुलेक र लिम्पियाधुरासहित)लाई अन्तराष्ट्रिय समुदायमा पठाउनेछौं।त्यसको लागि सरकारले गर्नु पर्ने आवश्यक तयारी गरिरहेको छ।’ उनका अनुसार उक्त नयाँ नक्साको अंग्रेजी रुपान्तरणको काम भइरहेको यो कार्य सकिएसँगै यही साउनको अन्त्यसम्ममा पठाइसक्ने उनको भनाइ छ।
सरकारले नेपालको नयाँ नक्सा जारी गरेपछि विभागले तत्कालै २५ हजार प्रति देशका विभिन्न भागमा पठाउनका लागि छपाइसकेको थियो भने स्थानीय निकाय, प्रादेशिक तथा अन्य सरकारी कार्यालयहरुका लागि नि:शुल्क तथा सर्वसाधारणको लागि भने रु ५० मा उपलब्ध गराइएको थियो।
सरकारले जेठ ७ गते कालापानी, लिपुलेक र लिम्पियाधुरासहितको नेपालको नयाँ नक्सा सार्वजनिक गरेको थियो। यसअघि सरकारले नयाँ नक्साको लागि संसदको दुवै सदन प्रतिनिधिसभा र प्रदेश सभामा भूमि व्यवस्था तथा गिरिबी निवारणमन्त्री पद्मा अर्यालले प्रस्ताव पेश गरेकी थिइन्।