होटलका कर्मचारीहरुले आगामी माघसम्म न्यूनतम तलबमात्र पाउने भएका छन । उनीहरुले ४ हजारदेखि १० हजार रुपैयाँसम्म तलब पाउने गरि सहमती भएको छ ।
होटल व्यवसायी सँघ (हान) र ट्रेड यूनियनबीच यस्तो सहमती अनुसार मजदुरहरुमा मागहरु सम्बोधन भएका हुन । बन्दाबन्दीले होटल व्यवसायमा गहिरो प्रभाव परी पूर्ण रूपमा बन्द रहेको कारणले आम्दानी शून्य हुन गई आर्थिक रूपमा ऋणात्मक हुन गएको अवस्था आएको हुनाले कर्मचारीलाई सामान्य सेवा सुविधा दिएको हामले जनाएको छ ।
नयाँ सम्झौताअनुसार अब होटलमा कार्यरत मजदूरले होटलको स्तरअनुसार न्यूनतम सेवा सुविधा पाउनेछन् ।
दुई सय बढी कोठा भएका होटलमा कार्यरत श्रमिक कर्मचारीले मासिक रु १० हजार पाउनेछन् । त्यस्तै २०० भन्दा कम कोठा भएका पाँचतारे होटलका श्रमिक कर्मचारीले रु ९ हजार पाउनेछन् । त्यस्तै १०० भन्दाबढी कोठा भएको चारतारे होटलमा कार्यरत मजदूरले रु ८ हजार ४ सय ५५ पाउनेछन् ।
एकसय भन्दा कम कोठा भएका चार तारे होटलका कर्मचारीले महिनामा रु ८ हजार पाउनेछन् भने तीनतारे होटल वा सोहीसरहका रिसोर्टका मजदूरले रु ५ हजार पाउने जनाइएको छ ।
यस्तै दुईतारे होटलले महिनामा प्रतिमजदूर रु ४ हजार ३०० तथा एकतारे वा अन्य पर्यटकस्तरीय होटलमा आपसी सम्झौताका आधारमा सुविधा उपलब्ध हुने भनिएको छ । होटल व्यवसायी र मजदूर सङ्गठनबीच विभिन्न चरणमा बैठक भई ‘बाँचौँ र बचाऔँ’ को नीति अख्तियार गरी सहकार्य गर्ने सहमति गरिएको हानले आज पत्रकार सम्मेलन गरी जानकारी दिएको छ । सम्झौताले दुःखका बेलामा पारिवारिक एकतासमेत प्रदर्शित भएको हानको ठम्याइ छ ।