नेपाल कम्युनिष्ट पार्टी (नेकपा)का अध्यक्ष पुष्पकमल दाहाल प्रचण्ड र जनता समाजवादी पार्टीका बाबुराम भट्टराईले सिन्धुपाल्चोकमा भएको विपत्तीलाई लिएर दुख व्यक्त गरेका छन्।
गएराति सिन्धुपाल्चोक, गुल्मी, बझाङलगायत देशका बिभिन्न जिल्लामा बाढी तथा पहिरोका कारण ठूलो मानवीय र धनमालको क्षति भएको छ ।
‘सिन्धुपाल्चोक, गुल्मी, बझाङ लगायत देशका बिभिन्न जिल्लामा बाढी तथा पहिरोका कारण ठूलो मानवीय र धनमालको क्षति हुनुका साथै कतिपय स्थान डुबानमा परेको घटनाले दुखित तुल्याएको छ’, उनले लेखेका छन्, ‘यो स्थितिमा प्राकृतिक प्रकोपमा परिवारजन गुमाउनु भएकाहरु प्रति हार्दिक संवेदना व्यक्त गर्न चाहन्छु।’ प्रचण्डले आफ्नो फेसबुक पेजमा लेखेका छन्
अहिले पनि कतिपय व्यक्ति वेपत्ता हुनुभएको र घरबारविहीन भएर बिचल्ली परेको अवस्था रहेकोले केन्द्र, प्रदेश, स्थानीय तहका सरकार, प्रशासन तथा पार्टी पंक्तिलाई उद्दार तथा राहतमा सक्रिय भएर जुट्न उनले आग्रह गरेका छन् ।
उनले यो विषम परिस्थितिमा धैर्य धारण गरी सतर्क रहन समेत अपिल गरेका छन्।
पूर्वप्रधानमन्त्री समेत रहेका जनता समाजवादी पार्टीका वरिष्ठ नेता डा. बाबुराम भट्टराईले सिन्धुपाल्चोकको बाढीबाट भएको क्षतिलाई लिएर दुःख व्यक्त गरेका छन् ।
उनले सामाजिक सञ्जाल ट्वीटरमा लेखेका छन्- ‘ सिन्धुपाल्चोकमा पछिल्लो भीषण बाढीपहिरो लगायत देशभर ठूलो जनधन क्षतिको शृंखला शुरूहुनु ज्यादै दु:खद छ । पहाडका भीरपाखामा मनपरी सडक लाने हैन त्यहाँका बस्ती सुरक्षित ठाउँमा सार्ने हो ! सडक/पानी/बिजुली/शिक्षा/स्वास्थ्य/बैंक लगायत पूर्वाधार केन्द्रित गरेर योजनाबद्ध बस्तीप्रणाली विकास गरौं !’
सिन्धुपाल्चोकमा पछिल्लो भीषण बाढीपहिरो लगायत देशभर ठूलो जनधन क्षतिको शृंखला शुरूहुनु ज्यादै दु:खद छ।पहाडका भीरपाखामा मनपरी सडक लाने हैन त्यहाँका बस्ती सुरक्षित ठाउँमा सार्ने हो!सडक/पानी/बिजुली/शिक्षा/स्वास्थ्य/बैंक लगायत पूर्वाधार केन्द्रित गरेर योजनाबद्ध बस्तीप्रणाली विकास गरौं!
— Baburam Bhattarai (@brb1954) July 9, 2020