पर्यटन तथा नागरिक उड्डयन मन्त्री योगेश भट्टराईले नेकपाको जारी विवादका बारेमा बोल्दै ‘प्रोक्सी वार’ बन्द गर्न आग्रह गरेका छन् ।
बुधवार बिहान प्रधानमन्त्री केपी शर्मा ओलीले बालुवाटारमा बोलाएको परामर्श बैठकमा सहभागी भएपछि निस्केर भट्टराईले विवाद सकारात्मक दिशामा जाने आशा गर्दै ‘प्रोक्सी वार’ बन्द गर्न आग्रह गरेका हुन् ।
पार्टीभित्र देखिएका समस्याका बारेमा परामर्श गर्न स्थायी कमिटीका साथीहरुलाई अध्यक्ष तथा प्रम कमरेड केपी ओलीले आज बिहान बोलाएको जानकारी दिदै उनले निस्केर भनेका छन, ‘बाँकी नेता र सदस्यहरुसँगै पनि परामर्श गर्ने प्रधानमन्त्रीले बताउनु भयो, जुन सकारात्मक छ ।
उक्त बैठकमा सहभागीहरुसँग प्रधानमन्त्री ओलीलाई पार्टी एकता बचाउन सुझाव दिएको भट्टराईले जानकारी दिएका छन ।
‘सहभागीहरुले कुनै पनि हालतमा पार्टी एकतालाई बचाउन, अन्तरविरोधको समाधानका लागि पहल गर्न, इतिहास र नेपाली जनताले दिएको जिम्मेवारीलाई पूरा गर्दै पार्टीलाई थप नयाँ जगमा अझ सुदृढ र एकताबद्ध बनाउन, विश्वाशको संकटलाई अन्त्य गरी हार्दिक र कमरेड्ली भावनाको विकास गर्न प्रमलाई सुझाब दिनुभएको छ,’ उनले फेसबुकमा लेखेका छन, ‘चिज साकारत्मक दिशामा जाने आशा गरौं । प्रोक्सी वार बन्द गरौ ।’