स्याङ्जाको अर्जुनचौपारीमा चितुवालाई स्थानीयले नियन्त्रणमा लिएका छन् ।
शुक्रबार राति कुखुरा खान खोरमा पसेको पोथी चितुवालाई नियन्त्रणमा लिईएको हो । अर्जुनचौपारी गाउँपालिकाको वडा नं. ४ राम्चेका स्थानीय रमाकान्त चापागाँईको घरमा रहेको कुखुराको खोरमा पसेको चितुवालाई नियन्त्रणमा लिईएको हो ।
खोरमा कुखुरा खान गएको चितुवालाई खोर बन्द गरी फलेकहरु लगाएर नियन्त्रणमा लिईएको अर्जुनचौपारी वन अधिकृत राजेन्द्र शर्माले बताए । शर्माले भने, ‘राति केहि आवाज सुनेपछि घरकाले न्याउरी मुसा होला भन्दै हेर्दा बाघ भएको थाहा पाएपछि बाहिरबाट खोर बन्द गर्ने गर्नुभएछ । चितुवालाई खोरमा नियन्त्रण गर्न खोज्दा चापागाँईका छोराको खुट्टा समेत भाँचिएको रहेछ ।’
राति नै जिल्ला वनलाई जानकारी दिईएको र शनिबार जिल्ला वन कार्यालयको खोरमा चितुवालाई राखिएको छ । एकदुई दिन चितुवालाई राखिने र उपयुक्त स्थानमा सुरक्षित छाडिने जिल्ला वन अधिकृत कोमलराज शर्माले जानकारी दिए ।
घरभन्दा डेढ सय मिटर तल सालघारी रहेकाले सोही सालघारीबाट चितुवा आएको हुनसक्ने अनुमान गरिएको छ । कुखुराले खोरमा रहेको एउटा कुखुरा खाईसकेको थियो भने अर्कोलाई मारेर छाडेको थियो ।
