मोरङ र धनकुटा जिल्लामा कोरोना संक्रमित भेटिएसँगै नेपालका ३० जिल्लामा कोरोना संक्रमणको पुष्टि भएको छ ।

आइतबार साँझसम्म कोरोना संक्रमितको संख्या २९५ पुग्दा संक्रमित जिल्लाको संख्या ३० पुगेको हो ।

दोहोरो अंकमा (१० जना वा सोभन्दा बढी) संक्रमित रहेका जिल्लाको संख्या ६ पुगेको छ । जसमा पर्सा जिल्लामा ९१ जना, कपिलवस्तु जिल्लामा ४३ जना, बाँके जिल्लामा ३४ जना, उदयपुर जिल्लामा ३३ जना, रुपन्देही जिल्लामा २८ जना र रौतहट जिल्लामा १३ जना संक्रमित रहेका छन् ।

बाँके जिल्लामा आज एकजनाको निधन भएसँगै कोरोना भाइरसबाट ज्यान गुमाउनेको संख्या २ पुगेको छ । हिजो मात्र सिन्धुपाल्चोक बाह्रबिसे नगरपालिकाकी २९ वर्षिया सुत्केरीले कोरोनाको कारण ज्यान गुमाएकी थिइन् ।

त्यस्तै काठमाडौं जिल्लामा ८ जना संक्रमित रहेका छन् भने धनुषामा ६ जना र कैलालीमा ४ जना संक्रमित रहेका छन् । कैलालीका ४ जना नै उपचारपछि निको भएर घर फर्केका छन् ।

दाङ, बारा चितवन र महोत्तरीमा ३-३ जना संक्रमित भेटिएका छन् । त्यस्तै बाग्लुङ, झापा, भक्तपुर, धादिङ्ग, बर्दिया र मोरङ्ग जिल्लामा २-२ जना संक्रमित भेटिएका छन् ।

भोजपुर, कञ्चनपुर, नवलपरासी (पश्चिम), नवलपरासी ( पूर्व ), सप्तरी, मकवानपुर ,सिराहा, काभ्रे ,सिन्धुपाल्चोक र धनकुटामा १-१ जना संक्रमित भेटिएका छन् ।

अहिलेसम्म ३६ जना कोरोना संक्रमितहरु उपचारपछि निको भएर फर्केका छन् । जसमध्ये उदयपुर जिल्लामा १५ जना, काठमाडौं र कैलालीमा ४-४ जना, पर्सामा ३ जना, चितवन र बाग्लुङ जिल्लामा २-२ जना, रुपन्देही, रौतहट, धादिङ्ग, भोजपुर र कञ्चनपुर जिल्लाका १-१ जना संक्रमित निको भएर घर फर्केका छन् ।