चितवनको भरतपुरस्थित कोरोना अस्पतालमा मंगलबार साढे नौ बजे एक युवाको मृत्यु भएको छ। उनमा अर्कै गम्भीर रोग पनि रहेकाले मृत्यु के कारणले भएको हो भन्ने एकिन गर्न स्वाब काठमाडौं पठाइएको छ।
वीरगन्जका तीस वर्षीय ती युवामा छाला, फोक्सो र मृगौलालगायतको समस्या थियो।
उनी एक वर्षदेखि ‘एसएलई’ भन्ने रोगबाट ग्रस्त रहेको अस्पतालका प्रमुख भोजराज अधिकारीले सेतोपाटीलाई बताए।
यो रोग लागेपछि शरिरको प्रतिरोधात्मक क्षमताले त्रुटीवस स्वस्थ्य रहेका तन्तुहरूमा आक्रमण गर्छ। त्यसले बिरामीको मिर्गौला, मस्तिष्क, जोर्नी र छालामा असर गर्छ। अधिकारीले भने-उहाँको मिर्गौलामा पहिले नै समस्या थियो।
सुरूमा चितवनको सिएमसी अस्पतालमा पुगेका उनलाई ज्वरो र निमोनिया देखिएको भन्दै कोरोना अस्पतालमा पठाइएको थियो। उनको अवस्था गम्भीर भएपछि उनलाई आइसियुमा राखिएको थियो।
‘बिरामीलाई सुरूमा आइसोलेसनमा राखेका थियौं, अवस्था गम्भीर भएपछि आइसियुमा राख्यौं, त्यहीँ मृत्यु भयो,’ उनले भने।
युवामा कोरोना भाइरसको संक्रमण भए/नभएको एकिन गर्न उनको स्वाब सोमबार साँझ निकालेर आज बिहान काठमाडौं पठाइएको अधिकारीले बताए।
‘लक डाउनले गर्दा जहाज चलेका छैनन्, हामीले स्वाब गाडीबाट पठाएका छौं’ उनेल भने।
राष्ट्रिय जनस्वास्थ्य प्रयोगशालामा भने मंगलबार १२ बजेसम्म स्वाब आइनपुगेको प्रयोगशालाकी निर्देशक डाक्टर रूना झाले सेतोपाटीलाई जानकारी दिइन्।
‘नमूना आइसकेको छैन,’ उनले भनिन् ‘आएपछि तत्काल जाँच गरे पनि नतिजा आउन कम्तिमा ८ घन्टा लाग्छ।’
ती युवाको मृत्युको कारण ‘एसएलई’ मात्र हो वा उनलाई कोरोनाको संक्रमण पनि थियो भन्ने यकिन परीक्षणको नतिजा आएपछि मात्र हुनेछ।