काठमाडौं । नेकपा (एमाले)का अध्यक्ष केपी शर्मा ओलीले आफू नेतृत्वको तत्कालीन सरकार लोकतान्त्रिक प्रक्रियाबाट नभई बलजफ्ती, आगजनी र लुटपाटमार्फत हटाइएको दाबी गरेका छन् ।
आइतबार काठमाडौंमा अखिल नेपाल किसान महासंघको बैठकलाई सम्बोधन गर्दै उनले जेन–जी आन्दोलनका क्रममा राज्यका संयन्त्र निष्क्रिय र निस्प्रभावी बनाइएपछि आफूहरू सरकारबाट हट्नुपरेको बताए । आन्दोलनका क्रममा भएका हिंसा, आगजनी र लुटपाटका घटनाको निष्पक्ष छानबिन नभएको उनको आरोप थियो ।
सरकारद्वारा गठित छानबिन आयोग र राष्ट्रिय मानव अधिकार आयोगले घटनाको निष्पक्ष अनुसन्धान गर्नुको सट्टा आफूलाई आरोपित गर्ने उद्देश्य राखेको ओलीले बताए । प्रधानमन्त्री र गृहमन्त्रीले गोली चलाउन आदेश नदिएको निष्कर्ष आयोगहरूकै रहेको उल्लेख गर्दै उनले तत्कालीन सञ्चारमन्त्रीलाई विदेशी सामाजिक सञ्जाल कम्पनी नियमन गर्न खोजेको विषयमा कारबाही गर्नुपर्ने राष्ट्रिय मानव अधिकार आयोगको निष्कर्षप्रति पनि आपत्ति जनाए ।
‘हामीले लोकतान्त्रिक बाटोबाट धक्का खाएका होइनौँ । बलजफ्ती, आगो लगाएर, लुटपाट गरेर, राज्यका संयन्त्र निष्क्रिय र निस्प्रभावी भएर हामी सरकारबाट हटाइयौँ,’ ओलीले भने ।
उनले विघटित प्रतिनिधिसभासम्बन्धी मुद्दाको फैसला गर्न ढिलाइ गरेको भन्दै सर्वोच्च अदालतको पनि आलोचना गरे ।
ओलीले नेकपा एमालेलाई देशको निर्णायक राजनीतिक शक्तिका रूपमा विकास गर्ने अभियानमा आफूहरू अघि बढिरहेको बताए ।