भक्तपुर । वाग्मती प्रदेशका मुख्यमन्त्री किरण थापा मगरले नेपाल भाषा र तामाङ भाषालाई प्रदेशमा सरकारी कामकाजको भाषाका रूपमा प्रयोग गर्ने कानुनी व्यवस्था गरिएको बताएका छन्।
मंगलबार राष्ट्रिय विभूति शंखधर साख्वाः प्रतिष्ठानले नेपाल संवत् ११४७ को नयाँ वर्षका अवसरमा भक्तपुरमा आयोजना गरेको कार्यक्रममा उनले प्रदेश सरकारले भाषा, साहित्य, कला र संस्कृतिको संरक्षण तथा प्रवर्द्धनलाई प्राथमिकता दिएको बताए।
नेपाल भाषा र तामाङ भाषालाई सरकारी कामकाजमा प्रयोग गर्ने गरी ऐन निर्माण गरी कार्यान्वयनको प्रक्रिया अघि बढाइएको उनले जानकारी दिए। बहुभाषिक र बहुजातीय मुलुकमा प्रदेशको भाषिक तथा सांस्कृतिक पहिचानलाई सरकारी मान्यता दिनु संघीयताको महत्त्वपूर्ण उपलब्धि भएको उनको भनाइ छ।
प्रदेश सरकारले भाषा, साहित्य, कला र संस्कृतिको उत्थानका लागि हरेक वर्ष बजेट विनियोजन गर्दै आएको उल्लेख गर्दै उनले शंखधर साख्वाः प्रतिष्ठानको संरक्षण, संग्रहालय निर्माण तथा विकासका लागि पनि बजेट छुट्याइएको बताए। शंखधर साख्वाको योगदान र पहिचानलाई प्रदेशका १३ वटै जिल्लामा स्थापित गर्नुपर्ने उनको भनाइ थियो। यस वर्ष दोलखामा शंखधर साख्वाः प्रतिष्ठान निर्माणका लागि समेत बजेट विनियोजन गरिएको उनले जानकारी दिए।
मुख्यमन्त्री थापा मगरले शंखधर साख्वाले ऋणमा डुबेका सर्वसाधारणलाई ऋणमुक्त गराएर मानवता, परोपकार र सामाजिक सेवाको उदाहरण प्रस्तुत गरेको उल्लेख गरे। नेपाल संवत् मौलिक राष्ट्रिय पहिचान र गौरवको प्रतीक बनेको भन्दै उनले शंखधरको योगदानको संरक्षण र प्रचारप्रसारमा प्रतिष्ठानले खेलेको भूमिकाको प्रशंसा गरे।
