काठमाडौं । काठमाडौं महानगरपालिकाकी कार्यवाहक प्रमुख सुनिता डंगोलले शंखधर साख्वाको परोपकारी भावना आत्मसात् गर्दै नागरिक केन्द्रित लोककल्याणकारी राज्य निर्माणमा जुट्नुपर्ने बताएकी छन्।
मंगलबार नेपाल संवत् ११४७ को अवसरमा आयोजित कार्यक्रममा उनले शंखधर साख्वालाई नेपाल संवत्का प्रवर्तकका रूपमा मात्र नभई समाजप्रतिको उत्तरदायित्व र परोपकारका प्रतीकका रूपमा स्मरण गर्नुपर्ने बताइन्।
व्यक्तिगत सम्पत्ति र सुखसुविधा आर्जन गर्नुभन्दा समाजको हित, नागरिकको दुःख निवारण र सकारात्मक परिवर्तनका लागि योगदान गर्नु नै व्यक्तिको वास्तविक महानता भएको उनको भनाइ छ। व्यक्तिको महानता उसले जीवनमा कति कमायो भन्नेभन्दा पनि समाजलाई कति योगदान दियो भन्ने आधारमा मापन हुनुपर्ने उनले बताइन्।
राज्य कर संकलन र प्रशासन सञ्चालन गर्ने संयन्त्रमा मात्र सीमित हुन नहुने उल्लेख गर्दै डंगोलले विपन्न, सीमान्तकृत, पछाडि परेका तथा दुःखमा रहेका नागरिकको हित सुनिश्चित गर्नु राज्यको प्रमुख दायित्व भएको बताइन्। लोककल्याणकारी राज्यको केन्द्रमा आम नागरिक हुनुपर्ने र स्वास्थ्य, शिक्षा, न्याय तथा सामाजिक अधिकार सुनिश्चित गर्न नागरिकमैत्री नीति, कानुन र कार्यक्रम आवश्यक रहेको उनले बताइन्।
‘राज्य भनेको कर लिने अनि प्रशासन चलाउने मात्र संयन्त्र होइन,’ उनले भनिन्, ‘लोककल्याणकारी राज्यमा सदैव केन्द्रबिन्दुमा आम नागरिक हुनुपर्दछ।’
महानगरपालिकाले पनि लोककल्याणकारी राज्यको अवधारणा र जनभावनाअनुसार काम गरिरहेको उनले बताइन्। नागरिकको सहजताका लागि स्वास्थ्य र न्याय क्षेत्रमा विभिन्न कार्यक्रम सञ्चालन गरिएको उल्लेख गर्दै उनले बाइक एम्बुलेन्स सेवा, निःशुल्क कानुनी सहायता र झिलिमिली सहर बनाउने अभियानलाई उदाहरणका रूपमा प्रस्तुत गरिन्।
तिहारसम्म अँध्यारा स्थानमा सडकबत्ती जडान गर्ने लक्ष्यसहित टेन्डर प्रक्रिया अघि बढाइए पनि प्राविधिक कारणले यसपटक पूरा हुन नसकेको उनले बताइन्। आगामी दिनमा झिलिमिली सहर बनाउने अभियानलाई निरन्तरता दिइने उनको भनाइ छ।
यसैगरी, महानगरपालिकाले श्रीगणेश र श्रीभैरवका लागि निवास निर्माण गर्ने घोषणा गरेको छ। निर्माण कार्यको मंसिर ५ गते पूजाआजासहित शिलान्यास गर्ने तयारी रहेको डंगोलले जानकारी दिइन्।
जीवित देवी कुमारीसँगै जीवित देवता श्रीगणेश र श्रीभैरवको पनि एकै स्थानमा निवास हुनुपर्ने स्थानीय समुदायको लामो समयदेखिको माग सम्बोधन गर्न महानगरले निर्माण प्रक्रिया अघि बढाएको उनले बताइन्।
