एजेन्सी ।अमेरिकी राष्ट्रपति डोनाल्ड ट्रम्पले इरानसँगको युद्ध सैन्य रूपमा समाप्त भएको दाबी गरेका छन् । तत्काल आक्रमण पुनः सुरु गर्नुपर्ने आवश्यकता नरहेको बताउँदै उनले इरानले आणविक कार्यक्रमबारे अमेरिकी चासो सम्बोधन नगरे पुनः सैन्य कारबाही गर्न सकिने चेतावनी दिएका छन् ।
कतारका प्रधानमन्त्री शेख मोहम्मद बिन अब्दुलरहमान बिन जसिम अल थानीसँग सोमबार ह्वाइट हाउसमा भएको भेटवार्तापछि पत्रकारहरूसँग कुरा गर्दै ट्रम्पले इरानको सैन्य क्षमता र नेतृत्व कमजोर बनाइएको दाबी गरे।
युद्धको दीर्घकालीन समाधान खोजिरहेको उल्लेख गर्दै उनले कतार, साउदी अरेबिया, संयुक्त अरब इमिरेट्स, बहराइन र कुवेतलगायत क्षेत्रीय सहयोगी राष्ट्र पनि युद्धको वर्तमान अवस्था कायम राख्न इच्छुक रहेको बताए।
इरानसँग वार्ता भइरहेको र सकारात्मक सङ्केत प्राप्त भएको दाबी गर्दै ट्रम्पले युद्ध अन्त्य हुने सम्भावना राम्रो रहेको बताए। यद्यपि, आवश्यक परे अमेरिकी सेना जुनसुकै बेला सैन्य कारबाही गर्न तयार रहेको उनको भनाइ थियो । इरानी तेलको आपूर्ति रोक्न लगाइएको अमेरिकी नौसैनिक नाकाबन्दी भने जारी रहने उनले स्पष्ट पारे।
इरानसँगको आठ महिनादेखि जारी युद्ध, इन्धनको मूल्यवृद्धि र विश्व अर्थतन्त्रमा परेको प्रभावप्रति अमेरिकी मतदाताको असन्तुष्टि बढिरहेका बेला ट्रम्पको यस्तो अभिव्यक्ति आएको हो । हालै सम्पन्न मध्यावधि निर्वाचनमा उहाँको रिपब्लिकन पार्टीले कङ्ग्रेसका दुवै सदनमा डेमोक्रेटिक पार्टीसँग पराजय व्यहोरेको थियो ।
यसैबीच, कतारका अधिकारीहरूले गत साता इरानको आणविक कार्यक्रमसम्बन्धी प्रस्ताव प्रस्तुत गरेको विषयमा जानकार दुई मध्यपूर्वी सरकारी अधिकारीले बताएका छन् । इरानले भने वार्ताअघि बन्दरगाहमाथिको नाकाबन्दी र आर्थिक प्रतिबन्ध हटाउनुपर्ने, रोक्का गरिएको सम्पत्ति फिर्ता गर्नुपर्ने, युद्धको क्षतिपूर्ति दिनुपर्ने तथा क्षेत्रीय शत्रुता अन्त्य गर्नुपर्ने सर्त राख्दै आएको छ ।
अमेरिकी रक्षामन्त्री पीट हेग्सेथले युद्धसम्बन्धी आगामी निर्णय राष्ट्रपतिमा निर्भर रहेको बताए । युद्ध सुरु गर्न कङ्ग्रेसको अनुमति नलिएको भन्दै उनको आलोचना भइरहेको छ । केन्टकीका रिपब्लिकन सांसद थोमस मेसीले सोमबार रक्षामन्त्री हेग्सेथविरुद्ध महाभियोग प्रक्रिया अघि बढाउन मतदानको माग गरेका थिए ।
ट्रम्पले इरानसँग बलियो सम्झौताको दिशामा प्रगति भए पुनः आक्रमणको सम्भावना कम हुने बताएका छन् । तर सैन्य कारबाही पुनः सुरु गर्नुपरे इरानका ३८ वटा पुलसहितका पूर्वाधारलाई निशाना बनाउने चेतावनी उनले दिए ।
युद्ध अन्त्यको सङ्केत गरे पनि अमेरिकाले इरानमाथि सीमित आक्रमण भने जारी राखेको छ । गत साता इरानको हवाई प्रतिरक्षा प्रणालीलाई लक्षित गरी कम्तीमा दुईपटक आक्रमण गरिएको थियो ।
अमेरिकी नौसैनिक नाकाबन्दी तोड्न खोजेको आरोपमा शनिबार एउटा व्यापारिक जहाजमाथि गोली प्रहार गरी निष्क्रिय पारिएको अमेरिकी सेनाले जनाएको छ ।
