पोखरा । पर्यटकीय सिजन सुरु भएसँगै पोखरा आसपासका ग्रामीण बस्तीमा आन्तरिक तथा विदेशी पर्यटकको चहलपहल बढेको छ। प्रकृतिको निकटता, हिमशृङ्खलाको दृश्य, स्थानीय खानपान र मौलिक संस्कृतिको अनुभव लिन चाहने पर्यटक गाउँका होमस्टेतर्फ आकर्षित भएका हुन्।
दसैँपछि कास्कीका ग्रामीण बस्तीमा पर्यटकको आगमन बढ्दा होमस्टे सञ्चालक उत्साहित छन्। पोखरा महानगर आसपासका डाँडाकाँडादेखि माछापुच्छ्रे गाउँपालिका–६ स्थित हेम्जाकोटसम्म पर्यटकको चहलपहल बढेको छ। शान्त वातावरण र गाउँको मौलिक जीवनशैलीले पोखरा घुम्न आउने पर्यटकलाई समेत आसपासका बस्तीमा समय बिताउन आकर्षित गरेको छ।
ग्रामीण पर्यटन प्रवर्द्धन मञ्च (भिटोफ) का सचिव भीमराज पौडेलका अनुसार पोखरा आउने पर्यटकलाई आसपासका गाउँसम्म पुर्याउन सके ग्रामीण पर्यटनले थप गति लिन सक्छ। उनका अनुसार होमस्टेमा पाहुनाको आगमन राम्रो छ। सातामा दुई दिन बिदा हुने भएकाले शुक्रबार र शनिबार पर्यटकको चाप बढी हुने गरेको छ।
होमस्टे सञ्चालक उमा गुरुङ पनि अघिल्लो वर्षको तुलनामा यस वर्ष पर्यटकको आगमन बढेकोमा खुसी छन्। पर्यटक बढ्दा स्थानीयस्तरमै आम्दानीको अवसर सिर्जना भएको र कोरोना महामारीपछि सुस्ताएको होमस्टे व्यवसाय पुनः तङ्ग्रिन थालेको उनले बताइन्।
गाउँमा पर्यटकको आगमन बढेसँगै होमस्टे सञ्चालकले मौलिक घर, स्थानीय परिकार, प्राकृतिक वातावरण र परम्परागत आतिथ्यतालाई प्राथमिकता दिएका छन्। पर्यटन बोर्डका सदस्य सन्तोष पोखरेलका अनुसार गाउँमा पर्यटकको बसाइ सहज र आकर्षक बनाउन विभिन्न तालिम तथा प्रवर्द्धनात्मक कार्यक्रम सञ्चालन हुँदै आएका छन्। प्रकृतिमा रमाउन र रैथाने खानाको स्वाद लिन चाहने पर्यटकका लागि पोखराका ग्रामीण होमस्टे उपयुक्त गन्तव्य बन्दै गएको उनले बताए।
पर्यटकलाई आवाससँगै स्थानीय संस्कृति, मौलिक घर र खानपानको अनुभव दिन सके ग्रामीण पर्यटनबाट स्थानीय समुदायले थप लाभ लिन सक्ने अपेक्षा गरिएको छ। दसैँपछि बढेको पर्यटकको चहलपहलले गाउँमा रोजगारी र आम्दानीका अवसर विस्तार हुने आशा जगाएको छ।
