काठमाडौं। गैरआवासीय नेपाली संघ (एनआरएनए)ले बाढीपहिरो प्रभावितका लागि ५ करोड रुपैयाँ बराबरको राहत प्याकेज घोषणा गरेको छ। संघले नुवाकोटको बट्टार, त्रिशूली बजारलगायत प्रभावित क्षेत्रमा राहत सामग्री वितरणसमेत थालेको छ।
संघका संस्थापक अध्यक्ष डा. उपेन्द्र महतो र केन्द्रीय उपाध्यक्ष रोजिना प्रधान राईसहितको टोलीले प्रभावित क्षेत्रको स्थलगत अवलोकन गरी खाद्यान्न, लत्ताकपडा, औषधि र टेन्ट वितरण गरेको हो।
स्थलगत निरीक्षणपछि महतोले सञ्चारमाध्यम र सामाजिक सञ्जालमा देखिएको भन्दा क्षति निकै ठूलो रहेको बताए। ‘हामीले सोचेको भन्दा कैयौँ गुणा बढी क्षति भएको रहेछ, जुन शब्दमा वर्णन गर्नै कठिन छ,’ उनले भने।
एनआरएनएले पहिलो चरणमा ५ करोड रुपैयाँ बराबरको राहत वितरण गर्ने जनाएको छ। त्यसपछि नेपाल सरकारसँग समन्वय गरी प्रभावित क्षेत्रको पुनःस्थापना र पुनर्निर्माणमा सहकार्य गर्ने संघको तयारी छ।
उपाध्यक्ष राईका अनुसार स्थानीय प्रशासन, प्रमुख जिल्ला अधिकारीको कार्यालय र स्थानीय तहसँग समन्वय गरी राहत वितरण गरिनेछ। ‘हिजो मात्र हामीले आपत्कालीन बैठक बसी ५ करोड रुपैयाँको राहत प्याकेज घोषणा गरेका थियौँ,’ उनले भनिन्।
एनआरएनएको टोलीले नुवाकोटपछि अन्य प्रभावित जिल्लामा समेत पुगेर राहत वितरण गर्ने जनाएको छ।
