हेटौँडा । बागमती प्रदेशका मुख्यमन्त्री इन्द्रबहादुर बानियाँले प्रदेशसभालाई सम्बोधन गर्दै मार्ग प्रशस्त गर्ने भएका छन्। सरकार टिकाउन आवश्यक सांसदको समर्थन जुटाउन नसक्ने अवस्था बनेपछि उनले संसद्बाट मार्ग प्रशस्त गर्ने निर्णय गरेका हुन्।
सोमबार हेटौँडामा बसेको नेपाली कांग्रेस बागमती प्रदेश संसदीय दलको बैठकले मुख्यमन्त्री बानियाँले प्रदेशसभा बैठकलाई सम्बोधन गरी मार्ग प्रशस्त गर्ने निर्णय गरेको हो। बैठकले सरकार सञ्चालन तथा आगामी कार्ययोजनासम्बन्धी आवश्यक निर्णय गर्ने अधिकारसमेत मुख्यमन्त्री बानियाँलाई दिएको सरकारका प्रवक्ता तथा आर्थिक मामिला तथा योजना मन्त्री प्रभात तामाङले जानकारी दिए।
उनका अनुसार वर्तमान अवस्थामा प्रदेशसभाबाट विश्वासको मत प्राप्त गर्ने अवस्था नरहेकाले मुख्यमन्त्रीले संसद्लाई सम्बोधन गरेर मार्ग प्रशस्त गर्ने निर्णय भएको हो। त्यसपछि उत्पन्न हुने राजनीतिक परिस्थिति र नयाँ सरकार गठनसम्बन्धी सम्पूर्ण जिम्मेवारी पनि मुख्यमन्त्री बानियाँलाई नै दिइएको तामाङले बताए।
मुख्यमन्त्री बानियाँले सोमबार दिउँसो १ बजेका लागि बोलाइएको प्रदेशसभा बैठकमा विश्वासको मत लिने तयारी गरेका थिए। तर, एमाले र नेकपा मुख्यमन्त्रीको विपक्षमा मतदान गर्ने निर्णयमा पुगेका छन् भने राप्रपाले तटस्थ बस्ने निर्णय गरेको छ। यस्तो अवस्थामा विश्वासको मत प्राप्त हुने सम्भावना कमजोर बनेपछि मुख्यमन्त्री बानियाँले संसद्बाट मार्ग प्रशस्त गर्ने तयारी गरेका हुन्।
