काठमाडौँ । नेपाली कांग्रेसका प्रवक्ता देवराज चालिसेले पार्टीको १५औँ महाधिवेशनमा उपसभापति पदका लागि उम्मेदवारी दर्ता गराएका छन्। चालिसेले मंगलबार कांग्रेसको नयाँ नेतृत्व चयनका लागि भइरहेको मनोनयन दर्ता प्रक्रियाअन्तर्गत उपसभापति पदमा उम्मेदवारी दिएका हुन्।
यसअघि १४औँ महाधिवेशनमा सहमहामन्त्री पदमा उम्मेदवारी दिएका चालिसेले विशेष महाधिवेशनपछि कांग्रेसको प्रवक्ताको जिम्मेवारी सम्हाल्दै आएका छन्। विशेष महाधिवेशनको प्रक्रिया अघि बढाउने क्रममा पनि उनी सक्रिय थिए।
चालिसेले प्रवक्ताको जिम्मेवारी सम्हालिसकेपछि अब उपसभापति भएर पार्टीको नेतृत्व तहमा योगदान गर्ने आफ्नो चाहना रहेको यसअघि बताएका थिए। कांग्रेसको १५औँ महाधिवेशनबाट एक वरिष्ठ उपसभापतिसहित चार जना उपसभापति निर्वाचित हुने व्यवस्था गरिएको छ। चालिसेको उम्मेदवारीसँगै उपसभापति पदको प्रतिस्पर्धामा थप उम्मेदवार थपिएका छन्।
