काठमाडौं । राष्ट्रिय स्वतन्त्र पार्टी (रास्वपा) का प्रमुख सचेतक कविन्द्र बुर्लाकोटीले प्रेस स्वतन्त्रता, अभिव्यक्ति स्वतन्त्रता, सूचनाको हक र पारदर्शी संसदीय अभ्यासप्रति पार्टी प्रतिबद्ध रहेको बताएका छन् ।
सोमबार सञ्चारकर्मीसँग आयोजित छलफलमा उनले लोकतान्त्रिक मूल्य–मान्यताको सुदृढीकरण र मुलुक निर्माणका लागि सबै पक्षसँग सहकार्य गर्दै अघि बढ्ने रास्वपाको नीति रहेको बताए ।
बुर्लाकोटीले प्रेस स्वतन्त्रता, सूचनाको हक र पारदर्शी संसदीय अभ्यास लोकतन्त्रका आधारभूत अवयव भएको उल्लेख गर्दै ती सिद्धान्तलाई व्यवहारमा उतार्ने दिशामा पार्टी लागिरहेको बताए । उनले नेपाललाई युरोपेली तथा स्क्यान्डिनेभियन मुलुकहरूको लोकतान्त्रिक अभ्यासको स्तरमा पुर्याउने लक्ष्य रहे पनि त्यसका लागि आवश्यक कानुनी संरचना, पूर्वाधार र संस्थागत अभ्यास विकास हुन समय लाग्ने धारणा राखे ।
उनले भने, “आम नागरिकले अपेक्षा गरेअनुसार मुलुक निर्माणका लागि हामी सबैले सहकार्य गरेर अघि बढ्नुपर्छ । देश निर्माणमा हाम्रो भूमिका छ र त्यसलाई व्यवहारमा उतार्न हामी प्रतिबद्ध छौँ । प्रेस स्वतन्त्रता, अभिव्यक्ति स्वतन्त्रता, सूचनाको हक तथा पारदर्शी संसदीय अभ्यास लोकतन्त्रका आधारभूत अवयव हुन् । हामी यी सबैको पूर्ण अभ्यास गर्न चाहन्छौँ ।”
उनले विकसित लोकतान्त्रिक अभ्यास भएका मुलुकहरूको स्तरमा पुग्न आवश्यक कानुनी संरचना, संस्थागत सोच र पूर्वाधार निर्माणका लागि समय लाग्ने भए पनि त्यसतर्फका अभ्यास र प्रयास सुरु भइसकेको बताए ।
बुर्लाकोटीले सञ्चार जगतबाट प्राप्त सुझावलाई सकारात्मक रूपमा ग्रहण गर्दै आगामी दिनमा अझ प्रभावकारी सहकार्यका साथ अघि बढ्ने प्रतिबद्धता पनि जनाए ।
