पोखरा । पोखरा महानगरपालिकाको सेदीमा घर भाडामा लिएर अवैध रूपमा अनलाइन सट्टेबाजी (बेटिङ) सञ्चालन गर्दै आएको गिरोहका आठ जनालाई प्रहरीले पक्राउ गरेको छ ।
विशेष सूचनाका आधारमा खटिएको गण्डकी प्रदेश प्रहरी कार्यालय, जिल्ला प्रहरी कार्यालय कास्की र वडा प्रहरी कार्यालय बैदामको संयुक्त टोलीले छापा मारेर आठ जनालाई नियन्त्रणमा लिएको हो । स्थानीय जीवन श्रेष्ठको घरमा सातवटा कोठा भाडामा लिएर ‘सफ्टवेयर’ सम्बन्धी काम गर्ने बहानामा उनीहरूले अनलाइन सट्टेबाजी सञ्चालन गरिरहेका थिए । प्रहरीले उनीहरूलाई सट्टेबाजी गराइरहेकै अवस्थामा पक्राउ गरेको जनाएको छ।
प्रहरीले बरामद गरेका तीनवटा कम्प्युटरको प्रारम्भिक अध्ययनका क्रममा ठूलो परिमाणमा आर्थिक कारोबार भएको खुलेको छ । विवरणअनुसार तीनवटा डिजिटल सिटमा क्रमशः १ करोड ११ लाख ९९ हजार, ९ करोड २ लाख २२ हजार र १० करोड ५५ लाख ६८ हजार रुपैयाँ गरी कुल २० करोड ६९ लाख ८९ हजार ८३४ रुपैयाँ क्रेडिट भएको देखिएको छ ।
जिल्ला प्रहरी कार्यालय कास्कीका सूचना अधिकारी डीएसपी वीरेन्द्रकुमार पासवानका अनुसार गिरोहले कारोबारका लागि एक्सिस बैंक, आइडिएफसी बैंक र क्यानरा बैंकलगायत भारतीय बैंकका खाताका साथै २४ पे, पे बजार, गुगल पे र नोक्सोन पेजस्ता डिजिटल वालेट प्रयोग गर्ने गरेको थियो ।
सट्टेबाजी सञ्चालन गर्ने मुख्य व्यक्तिका रूपमा भारतको भुपा मानपुरका ३४ वर्षीय सत्यम सिंहलाई प्रहरीले पहिचान गरेको छ । उनीसँगै भारतका २४ वर्षीय हर्ष उसरेटे, २३ वर्षीय विशाल चाउ, २२ वर्षीय जमान सिंह तमार, २७ वर्षीय विक्रान सिंह, २६ वर्षीय अजितेशकुमार मिश्र र २४ वर्षीय सत्यम राजपूत पक्राउ परेका छन् । यस्तै, नेपालका दार्चुलाका ३१ वर्षीय दिनेश सिंह बोहोरालाई पनि प्रहरीले नियन्त्रणमा लिएको छ ।
अनुसन्धानका क्रममा गिरोहले टेलिग्राम र ह्वाट्सएपमार्फत ‘गुरुभाइ २४७ डट प्रो’ नामक लिङ्क प्रयोग गरी मानिसहरूलाई आबद्ध गराउने गरेको खुलेको छ । उक्त लिङ्कमार्फत रकम जम्मा गराएर क्रिकेट, फुटबल र क्यासिनोजस्ता खेलमा सट्टेबाजी गराउने गरिएको प्रहरीले जनाएको छ । जितेको रकम अनलाइन माध्यमबाटै भुक्तानी गर्ने व्यवस्था मिलाइएको थियो ।
घटनास्थलबाट प्रहरीले ७ थान ल्यापटप, ६ थान मनिटर, ३१ थान मोबाइल फोन, ३४ थान भारतीय सिमकार्ड, ९ थान किबोर्ड, २ थान राउटर तथा ब्याट्री र युपिएसलगायतका विद्युतीय सामग्री बरामद गरेको छ ।
जिल्ला प्रहरी कार्यालय कास्कीका प्रमुख एसपी नविन कार्कीले घटनाको प्रकृति हेर्दा यसमा ठूलो अन्तरदेशीय गिरोहको संलग्नता देखिएको र थप विस्तृत अनुसन्धान भइरहेको बताए । अनुसन्धानका क्रममा गिरोहले भारतीय नागरिकका बैंक खाता भाडामा लिएर आर्थिक कारोबार गर्ने गरेको खुलेको उनले बताए ।
प्रहरीका अनुसार गिरोहको मुख्य सञ्चालन केन्द्र भारतमा रहेको र पोखरामा सञ्चालित एकाइ २७औँ शाखाका रूपमा रहेको पाइएको छ । गिरोहले दैनिक ३ देखि ४ लाख भारतीय रुपैयाँसम्म आम्दानी गर्ने गरेको तथा त्यहाँ कार्यरत कामदारले मासिक २५ हजार भारतीय रुपैयाँ पारिश्रमिक पाउने गरेको पनि अनुसन्धानबाट खुलेको छ ।
