काठमाडौँ । त्रिभुवन विश्वविद्यालयको निमित्त उपकुलपतिको जिम्मेवारी इन्जिनियरिङ अध्ययन संस्थानका डीन प्रा. डा. सुशीलबहादुर बज्राचार्यलाई दिइएको छ ।
विश्वविद्यालयका उपकुलपतिसहित शीर्ष पदाधिकारीहरू अध्यादेशमार्फत पदमुक्त भएपछि कुलपति समेत रहेका प्रधानमन्त्री वालेन्द्र शाह (वालेन)ले बज्राचार्यलाई कार्यवाहक जिम्मेवारी प्रदान गरेका हुन् ।
यसअघि अध्यादेश जारी हुनुअघि नै तत्कालीन उपकुलपति प्रा. डा. दीपक अर्यालले राजीनामा दिएका थिए । त्यसपछि शिक्षाध्यक्ष प्रा. डा. खड्ग केसी र रजिस्ट्रार प्रा. डा. केदारप्रसाद रिजालले पनि पद त्याग गरेका थिए ।
पदाधिकारीहरू रिक्त भएपछि विश्वविद्यालयको दैनिक प्रशासन सञ्चालनका लागि निमित्त उपकुलपतिको जिम्मेवारी तोकिएको हो ।
यसैबीच उपकुलपति नियुक्तिका लागि सिफारिस समिति गठन भइसकेको र आवेदन प्रक्रिया सुरु गरिएको विश्वविद्यालयले जनाएको छ । आवेदन दिनका लागि १० दिनको समय निर्धारण गरिएको छ ।
