काठमाडौँ । विवादित व्यापारी दिपक भट्टसँग नाम जोडिएको विषयमा गृहमन्त्री सुधन गुरुङले सामाजिक सञ्जालमार्फत विस्तृत स्पष्टीकरण दिएका छन्। पछिल्ला दिनमा विभिन्न माध्यममा आफ्नो नाम जोडेर चर्चा भइरहेको सन्दर्भमा उनले विषयलाई “सरल र तथ्यमा आधारित रूपमा बुझ्नुपर्ने” बताएका छन्। गुरुङले आरोपहरूलाई हल्लामूलक रूपमा प्रस्तुत गरिएको उल्लेख गर्दै वास्तविकता प्रमाणबाट पुष्टि हुने विषय भएको बताएका हुन्।
गृहमन्त्री गुरुङले “२५ लाखको सेयर लुकाइएको” भन्ने आरोपप्रति प्रतिक्रिया दिँदै आफूले धितोपत्र बजारमा कारोबार हुने सेयरहरूमा २ करोडभन्दा बढी लगानी सम्पत्ति विवरणमै स्पष्ट रूपमा उल्लेख गरेको दाबी गरेका छन्। उनका अनुसार विभिन्न कम्पनीहरूमा गरिएको लगानी एउटै वर्गभित्र समेटिएकाले यसलाई लुकाइएको भन्नु गलत व्याख्या भएको बताएका छन्। “लुकाउने व्यक्तिले खुला रूपमा करोडौंको सम्पत्ति विवरण सार्वजनिक गर्दैन,” उनले उल्लेख गरेका छन्।
उनले आफूले गरेको सम्पूर्ण लगानी बैंकिङ च्यानलमार्फत भएको र यसको स्रोत कर्जा (ऋण) रहेको स्पष्ट पारेका छन्। उनका अनुसार २०८० साल भदौ २९ गते गरिएको लिखित तमसुकअनुसार लिइएको ऋण बैंकमार्फत प्राप्त भएको र सोही रकम लगानीमा प्रयोग गरिएको हो। गुरुङले पैसा कहाँबाट आएको भन्ने विषय अनुमानको नभई बैंक र कागजी प्रमाणबाट पुष्टि हुने विषय भएको बताएका छन्।
विवादित व्यक्तिसँग साझेदारी रहेको आरोपबारे गृहमन्त्री गुरुङले एउटै कम्पनीमा सयौं वा हजारौं सेयरधनी हुने भएकाले सेयर खरिद गर्नु सबैसँग साझेदारी गर्नु नभएको तर्क गरेका छन्। उनले एउटै कम्पनीमा बैंक, मिडिया हाउसलगायत विभिन्न निकायहरूको समेत लगानी रहने उल्लेख गर्दै त्यस्ता सबैलाई एउटै आधारमा दोषी ठहर गर्नु न्यायोचित नहुने बताएका छन्।
‘कन्फ्लिक्ट अफ इन्टेरेस्ट’ सम्बन्धी आरोपबारे स्पष्ट पार्दै उनले यस विषयको छानबिन गर्ने निकाय सम्पत्ति शुद्धिकरण विभाग भएको उल्लेख गरेका छन्, जुन अर्थ मन्त्रालय अन्तर्गत पर्दछ। उक्त निकायले प्रक्रिया अनुसार विषय हेरिरहेको र आफूले कुनै हस्तक्षेप नगरेको दाबी गर्दै उनले यदि हस्तक्षेप भएको भए छानबिन प्रक्रिया नै अघि नबढ्ने बताएका छन्।
गुरुङले लगानी गर्दा सबै पृष्ठभूमि र भविष्यका घटनाक्रम पहिल्यै थाहा नहुने र व्यापारिक लगानीमा जोखिम स्वाभाविक हुने उल्लेख गरेका छन्। उनका अनुसार पछि विकसित भएका घटनालाई आधार बनाएर अघिल्लो निर्णयलाई दोष दिनु तथ्यभन्दा बढी व्याख्यात्मक दृष्टिकोण भएको बताएका छन्।
संवेदनशील विषयमा तत्काल प्रतिक्रिया नदिनु उपयुक्त हुने उल्लेख गर्दै उनले हल्ला छिटो फैलिने तर सत्य प्रमाणसहित मात्र स्थापित हुने बताएका छन्। साथै, “पार्टीको नारा र व्यवहार फरक भयो” भन्ने आलोचनाप्रति प्रतिक्रिया दिँदै व्यक्तिगत लगानीलाई बिचौलियापनसँग जोड्नु गलत भएको बताएका छन्।
स्टाटसको अन्त्यमा गृहमन्त्री गुरुङले आरोप र सत्य फरक विषय भएको उल्लेख गर्दै निर्णय भावनामा नभई प्रमाणका आधारमा हुनुपर्ने बताएका छन्। उनले पार्टीले गर्ने हरेक निर्णयको पूर्ण पालना गर्ने र अनुसन्धानमा आवश्यक सहयोग गर्न तयार रहेको समेत जनाएका छन्।
