काठमाडौँ । निर्वाचन आयोगले देशभर प्रतिघण्टा आठदेखि १० प्रतिशतका दरले मतदानको बढ्दै गएको जनाएको छ । आयोगका प्रवक्ता नारायणप्रसाद भट्टराईले मध्यान्हपछि मतदानको प्रतिशत बढेको जानकारी दिए ।
प्रवक्ता भट्टराईले बिहानीपख हिमाली तथा पहाडी जिल्लामा मतदानको प्रतिशत कम देखिए पनि दिउँसो हुदैँगएपछि मतदान प्रतिशत बढेको जानकारी दिए ।
‘अहिलेसम्म झण्डै २५ प्रतिशत मत खसेको छ,’ भट्टराईले भने, ‘तर प्रत्येक मिनेटमा प्रतिशत बढेको छ । साँझसम्म हामी कति प्रतिशत मत खस्यो भन्ने जानकारी गराउँछौ ।’
आयोगले मतदानमा मतदाताको उपस्थिति उत्साहजनक भएको पनि दाबी गरेको छ । आयोगले सर्लाहीलगायतका केही स्थानमा केही समय मतदान रोकिए पनि सहजीकरणपछि पुनः सञ्चालन भएको जनाएको छ ।
ओखलढुंगा र दाङलगायतका केही क्षेत्रमा मतदान बहिस्कार गरेको खबर आए पनि ति क्षेत्रमा सहजीकरण भइरहेको आयोगले जनाएको छ । पछिल्लो तथ्यांकअनुसार मुस्ताङमा ४० प्रतिशत मत खसेको आयोगले जनाएको छ ।
