काठमाडौँ । प्रतिनिधि सभा सदस्य निर्वाचन २०८२ फागुन २१ गते सम्पन्न हुने तयारीअनुसार निर्वाचन आयोगले जिल्लाभरि आचारसंहिताको पालनामा कडा अनुगमन गर्न निर्देशन जारी गरेको छ।
निर्वाचन आयोगले सहायक प्रमुख जिल्ला अधिकारी तथा कोष तथा लेखा नियन्त्रक कार्यालयका प्रमुखलाई निर्वाचन आचारसंहिता अनुगमन अधिकृत तोक्दै मतदानअघि र मतदानको दिन जिल्लाभरि अनुगमन सुनिश्चित गर्न भनेको छ।
आयोगका अनुसार, मतदान हुनुअघि ४८ घण्टादेखि मतदान केन्द्र बन्द नभएसम्मका अवधिमा नियम उल्लङ्घन नहोस् भन्ने सुनिश्चित गर्नु अनुगमनकर्ताको प्राथमिक जिम्मेवारी हो। यस क्रममा कानुन वा आचारसंहिता विपरीत हुने कुनै पनि गतिविधि रोक्न अनुगमनकर्ताले आवश्यक कदम चाल्न सक्नेछन्।
साथै, आयोगले जिल्ला आचारसंहिता अनुगमन समितिसँग सहकार्य गर्दै अनुगमनको प्रभावकारिता बढाउने र उल्लंघन भएमा कानुन अनुसार कारबाही सुनिश्चित गर्ने व्यवस्था मिलाएको छ। आयोगले यस अभियानमार्फत नागरिकलाई निष्पक्ष, भयमुक्त र पारदर्शी निर्वाचनको वातावरण सिर्जना गर्न सहयोग गर्न अपिल गरेको छ।
