काठमाडौँ । गृह मन्त्रालयले निर्वाचन प्रक्रियालाई व्यवस्थित, स्वतन्त्र र भयमुक्त बनाउन वडातहसम्म समन्वय र सहकार्य विस्तार गर्ने नीतिगत खाका सार्वजनिक गरेको छ।
मन्त्रालयले ‘सुव्यवस्थित निर्वाचन व्यवस्थापनका लागि वडा तहसम्म समन्वय र सहकार्य अभिवृद्धि गर्ने सम्बन्धी अवधारणा, २०८२’ लागू गर्ने निर्णयसहित आवश्यक निर्देशन जिल्ला प्रशासन कार्यालयहरूलाई पठाइसकेको जनाएको छ। यस अवधारणामार्फत निर्वाचनका सम्पूर्ण चरणमा राजनीतिक दल, नागरिक समाज, सञ्चार क्षेत्र, निजी क्षेत्र तथा प्रबुद्ध वर्गको सक्रिय सहभागिता सुनिश्चित गर्ने लक्ष्य लिइएको छ।
गृह मन्त्रालयका अनुसार वडातहमा क्रियाशील राजनीतिक प्रतिनिधि, पदाधिकारी तथा समाजका जानकार व्यक्तिलाई निर्वाचन व्यवस्थापनका कार्यमा समेट्दा प्रक्रियाप्रति अपनत्व बढ्ने र निष्पक्षता सुदृढ हुने अपेक्षा गरिएको छ। सोही उद्देश्यका साथ अवधारणा कार्यान्वयनमा ल्याइएको मन्त्रालयका प्रवक्ता आनन्द काफ्लेले जानकारी दिए।
अवधारणा प्रभावकारी रूपमा लागू गर्न प्रमुख जिल्ला अधिकारी तथा जिल्ला सुरक्षा समितिका सबै पदाधिकारीलाई समन्वय, निगरानी र कार्यान्वयनको जिम्मेवारी तोकिएको मन्त्रालयले स्पष्ट पारेको छ।
