विश्वभर कोरोना सङ्क्रमणबाट निको हुनेको संख्या साढे ८१ लाख नाघेको छ ।
विहिवार नेपाली समयअनुसार साढे १० बजेसम्मको तथ्यांक अनुसार विश्वका विभिन्न देशमा १ करोड ३६ लाख ९६ हजार ७ सय ३८ जनामा सङ्क्रमण पुष्टि भएकोमा ८१ लाख ५५ हजारभन्दा धेरै मानिस उपचारपछि निको भएका वल्डोमिटरले जनाएको छ ।
अहिले उपचार गराइरहेका ४९ लाख ५४ हजारभन्दा धेरैमध्ये एक प्रतिशत अर्थात साढे ५९ हजार जनाको अवस्था जटिल रहे पनि बाँकी ४८ लाख ९४हजार भन्दा धेरैको अवस्था सामान्य छ । कोरोना सङ्क्रमणका कारण ५ लाख ८६ हजार भन्दा बढी ज्यान गएको छ ।
यसैबीच भारतमा एकैदिन ३२ हजारभन्दा धेरैमा सङ्क्रमण पुष्टि भएको छ । भारतमा गत २४ घन्टामा मात्रै ३२ हजार ६ सय ८२ नयाँ बिरामी थपिएका छन् भने ६ सय १४ जनाले ज्यान गुमाएका छन् । विश्वभर कोरोना सङ्क्रमित धेरै हुने देशको सूचीमा भारत तेस्रो स्थानमा छ ।
यस्तै भारतको बिहारमा आजदेखि १५ दिनका लागि लकडाउन गर्ने निर्णय भएको छ । सङ्क्रमितसँगै ज्यान गुमाउनेको संख्या बढ्न थालेपछि भारतको विभिन्न राज्यमा फेरि लकडाउन घोषणा गरिएको हो ।
सबैभन्दा धेरै अमेरिकामा ३६ लाख १६ हजार ७ सय ४७ जनामा सङ्क्रमण पुष्टि हुँदा १ लाख ४० हजार १ सय ४० जनाको ज्यान गएको छ ।
यस्तै ब्राजिलमा राष्ट्रपति जाएय बोलसोनारोसहित १९ लाख ७० हजारभन्दा धेरैमा सङ्क्रमण पुष्टि हुँदा साढे ७५ हजारको ज्यान गएको छ । राष्ट्रपति बोलसोनासोको दोस्रो रिपोर्ट पनि पोजेटिभ आएपछि उनी आइसोलेशनमा बसेका छन् ।
