काठमाडौं – काठमाडौं महानगरपालिकाका प्रमुख बालेन शाहले काठमाडौंमा सार्वजनिक जग्गाको संरक्षण र पुनःप्राप्तिको अभियान अन्तर्गत हालसम्म २३ अर्ब रुपैयाँभन्दा बढी मूल्य बराबरको २०८ रोपनी सार्वजनिक जग्गा फिर्ता गरिसकेको जानकारी दिएका छन्। उनका अनुसार अबको लक्ष्य २ खर्ब रुपैयाँ मूल्य बराबरको १ हजार ८५९ रोपनी १४ आना जग्गा माफियाको कब्जाबाट मुक्त गराउनु हो।
स्थानीय सरकार सञ्चालन ऐन, २०७४ ले स्थानीय सरकारलाई सार्वजनिक जग्गा तथा सम्पत्तिको संरक्षण, व्यवस्थापन र पुनःप्राप्तिको अधिकार दिएको उल्लेख गर्दै, मेयर शाहले आफूहरू निर्वाचित भएको पहिलो दिनदेखि नै “सार्वजनिक सम्पत्तिमा जनताको पहुँच वृद्धि गर्ने” नीति अनुरूप काम गरिरहेको बताए।
सार्वजनिक सम्पत्ति अतिक्रमण विरुद्ध महानगरले सुरु गरेको अभियान अन्तर्गत हालसम्म फिर्ता गरिएका जग्गाहरूलाई पुनः कब्जामा नपरोस् भन्ने उद्देश्यले ती क्षेत्रलाई खुला पार्क, खेलमैदान, स्केटपार्क, हरित क्षेत्र, सत्तल लगायतका सार्वजनिक प्रयोजनका संरचनाहरूमा परिणत गर्ने कार्य तीव्र गतिमा भइरहेको छ।
यसै क्रममा अतिक्रमित केही खोला कोरिडोरहरू पनि खाली गराइएको महानगरले जानकारी दिएको छ।
सार्वजनिक सम्पत्तिको संरक्षण र पुनःप्राप्तिलाई थप प्रभावकारी बनाउन पूर्वसचिव रामबहादुर रावलको अध्यक्षतामा गठित आयोगले तयार पारेको प्रतिवेदनलाई नीति आधारका रूपमा लिइएको छ। आयोगले पहिचान गरेका अतिक्रमणकर्ताहरूको नाम, ठेगाना, कित्ता नम्बर र मिचिएको क्षेत्रफलसहितको विस्तृत विवरण समेत सार्वजनिक गरिएको छ।
मेयर शाहका अनुसार प्रतिवेदनमा सार्वजनिक जग्गा मिच्नेमध्ये धेरैजसो व्यक्ति राजनीतिक पहुँच भएका, नीति निर्माण तहसम्मका व्यक्ति रहेको उल्लेख छ। उनका अनुसार चालु आर्थिक वर्षको नीति तथा बजेटमा सार्वजनिक सम्पत्ति पुनःप्राप्तिको कार्यलाई प्राथमिकतामा राखिएको छ।
अब गठन गरिएको कार्यान्वयन समितिले भोलिदेखि काम प्रारम्भ गर्ने जानकारी दिँदै, मेयर शाहले सम्पूर्ण महानगरवासी, सरोकारवाला निकाय, समुदाय र संस्थाहरूलाई सहयोग र सहकार्यका लागि अनुरोध गरेका छन्।
महानगरपालिकाले यदि अरू सार्वजनिक सम्पत्तिमा अतिक्रमणबारे जानकारी भएमा सहरी व्यवस्थापन विभागमा खबर गरिदिन अनुरोध गरेको छ।
“यो संघर्ष केवल सार्वजनिक जग्गा फिर्ता ल्याउने मात्र होइन,” मेयर शाहले भने, “सार्वजनिक सम्पत्तिमा जनताको पहुँच स्थापना गर्ने, नागरिकको उपभोग अधिकार सुनिश्चित गर्ने र स्वाभिमान जोगाउने अभियान पनि हो।”
