पोखरा। तिहारमा प्रयोग हुने सयपत्री फूलको मागको करिब ७५ प्रतिशत पोखरामै उत्पादित फूलले धान्ने अनुमान गरिएको छ। यस वर्ष पोखरा महानगरपालिकाभित्र करिब २०० रोपनी क्षेत्रफलमा सयपत्री फूल खेती गरिएको छ।
स्थानीय कृषि उत्पादन प्रवर्द्धन र किसानको आयआर्जन वृद्धि गर्ने उद्देश्यले पोखरा महानगरपालिकाले पछिल्लो तीन वर्षदेखि तिहार लक्षित फूल खेतीलाई प्राथमिकता दिँदै आएको छ। महानगरले किसानलाई सयपत्री फूलको बीउ, मल्चिङ प्लास्टिक, कृषि सामग्री तथा प्राविधिक तालिम र सहयोग उपलब्ध गराउँदै आएको कृषि महाशाखा प्रमुख एवं वरिष्ठ कृषि विकास अधिकृत मनहर कडरियाले बताए।
महानगरको सहयोग, किसानको मेहनत र विभिन्न संघसंस्थाको सहकार्यमा पोखरामा फूल खेती विस्तार हुँदै गएको कडरियाको भनाइ छ। यसले स्थानीय बजारको माग पूरा गर्न सघाउनुका साथै किसानका लागि आम्दानीको नयाँ अवसर सिर्जना गरेको छ।
तिहार नजिकिँदै गर्दा कृषि महाशाखाले किसानका बारीमै पुगेर फूल खेतीको अवस्था, उत्पादन र बजारमा आपूर्तिको तयारीबारे अनुगमन गरिरहेको छ। यस वर्ष तिहार केही ढिलो परेकाले फूलको उत्पादन र बजारमा आपूर्ति व्यवस्थापनमा चुनौती देखिएको कडरियाले बताए।
तिहारमा सयपत्री फूलको माग उच्च हुने भएकाले स्थानीय उत्पादनलाई बजारसम्म पुर्याउन र किसानले उचित मूल्य पाउने वातावरण बनाउन महानगरले सहजीकरण गर्दै आएको छ।
विगतमा तिहारका लागि बाहिरी जिल्लाबाट फूल आयात गर्नुपर्ने अवस्था रहे पनि पछिल्ला वर्षमा पोखरामै खेती विस्तार भएपछि स्थानीय उत्पादनले बजारमा हिस्सा बढाउँदै गएको छ। स्थानीय उत्पादन बढ्दा किसानको आम्दानी वृद्धि हुनुका साथै बाहिरबाट हुने फूल आयातसमेत घट्ने अपेक्षा गरिएको छ।
