नेकपा एमालेको पोलिटव्युरो सदस्य, पूर्व मन्त्री तथा भक्तपुर क्षेत्र नं. २ का प्रतिनिधिसभाका उम्मेदवार महेश बस्नेतले आगामी मङ्सिर ४ गते हुने प्रतिनिधिसभा तथा प्रदेशसभाको निर्वाचनमा भक्तपुरबाट एमालेलाई कम्तीमा पनि ६० हजार मत ल्याई ऐतिहासिक जित निकाल्ने दाबी गरेका छन् ।
निर्वाचन परिचालन कमिटी भक्तपुर क्षेत्र नं. १ ले बुधवार आयोजना गरेको क्षेत्रीय चुनावी सभालाई सम्बोधन गर्दै पूर्व मन्त्री बस्नेतले प्रधानमन्त्री तथा नेपाली कांग्रेसका सभापति शेरबहादुर देउवालाई लक्षित गर्दै जनताले मङ्सिर ४ गते सूर्यमा भोट दिने र ६ गते रुखमा भोट दिने बताए ।
प्रधानमन्त्री देउवाले केही समय अधि एक कार्यक्रममा मङ्सिर ४ मा हुने निर्वाचनलाई मङ्सिर ६ गते हुने भनी अभिव्यक्ति दिएका थिए। प्रधानमन्त्रीलाई निर्वाचनको मिति समेत जानकारी नहुने सुस्त दिमागको भएको उल्लेख गर्दै उनले मुलुक निर्माणको लागि एमालेका अध्यक्ष केपी ओली जस्तो दुरदृष्टि भएको नेतालाई प्रधानमन्त्री बनाउनुपर्नेमा जोड दिए ।
प्रधानमन्त्री देउवाले लुम्बिनीमा आयोजित एक कार्यक्रममा भारतीय प्रधानमन्त्री नरेन्द्र मोदी प्रमुख अतिथि भएको एक कार्यक्रममा स्टेजमा नै र्याल चुहाएका थिए । सोही प्रसङ्गलाई कोट्याउँदै बस्नेतले प्रधानमन्त्री देउवाले अन्तर्राष्ट्रिय स्तरको कार्यक्रममा र्याल चुहाउने, निदाउने, सिँगान झार्ने लगायतका कार्यहरू गरी देशको नै बेइज्जत गरेको भन्दै आक्रोश जनाए ।
उनले भने, ‘युवा साथीहरूले भन्न थाल्नुभएको छ, ठिकै हो, ४ गते सूर्यमा भोट दिने हो । मुलुकको विकास र समृद्धिको नायक, दुरदृष्टि भएको केपी ओलीलाई प्रधानमन्त्री बनाउने हो । ६ गते कांग्रेसको रूपमा भोट हाल्ने हो, निर्वाचन सकेपछि मतपेटिका गनेर खोली भएको मतपेटिकामा हाल्ने हो । र्याल र सिँगान चुहाउने नेतालाई बिदाइ गर्ने हो ।’
एमालेको नेतृत्व कालमा विकासमय भएको सम्झँदै जनताहरू पछुताइरहेको उल्लेख गर्दै उनले एमालेको नेतृत्वमा दसैँ तिहार आएको जस्तै खुसी र उत्साह आउने बताए ।
उहाँले भने, ‘एमालेको तीन वटै सरकार भएको समयमा विकास र समृद्धिको यात्रामा जनताले देख्ने र प्रत्यक्ष भोग्ने गरी विकास नै विकास हुने गरेको थियो । विकासमा दसैँ तिहार आएजस्तै उत्साह थियो जनतामा तर अहिले गठबन्धन सरकार आएपछि जुठो परेको दसैँ तिहार जस्तो भएको छ । सबै विकासका आयोजनाहरू रोकिएका छन् । एमाले सरकारले थालेका केही बाहेक एउटा पनि विकासका कामहरू भएका छैनन् ।’
जनताले आगामी मङ्सिर ४ गते सूर्यमा भोट हालेपछि फेरी एमालेको सरकार आउने र विकासको लहर व्यापक मात्रामा ल्याउने उल्लेख गर्दै उहाँले जनताले भोट नदिएर गठबन्धनलाई सबक सिकाउने पर्नेमा जोड दिए ।
नेपाल मजदुर किसान पार्टीबाट निर्वाचित पूर्व सांसद प्रेम सुवाललाई लक्षित गर्दै उनले भक्तपुर क्षेत्र नं. १ बाट निर्वाचित जनप्रतिनिधिले सदनमा नियमापत्ति बाहेक केही पनि गर्न नजाने उल्लेख गरे । क्षेत्र नं. २ मा कांग्रेसले तीन पटक प्रतिनिधिसभामा निर्वाचित हुँदा एक पटक समेत भक्तपुरको आवाज राख्न नसकेको दाबी गरे ।