नेपाली कांग्रेसको प्रथम प्रदेश १ अधिवेशन मङ्सिर १६ गतेदेखि विराटनगरमा हुने भएको छ । कांग्रेस प्रदेश १ को प्रथम अधिवेशन प्रचार समितिले बुधबार विराटनगरमा पत्रकार सम्मेलन गरी प्रदेश १ को अधिवेशन विराटनगर–२ स्थित शङ्करपुरमा आयोजना गर्ने तयारी भएको जानकारी दिएको हो ।
बुधबार बसेको आयोजक समितिको बैठकले उक्त निर्णय गरेको कांग्रेस प्रथम प्रदेश अधिवेशन प्रचारसमिति संयोजक तथा कांग्रेस संसदीय दलका नेता राजीव कोइरालाले जानकारी दिए । अधिवेशनको उद्घाटन सत्र विराटनगर–२ शङ्करपुरमा रहेको खाली मैदानमा हुने बताए । अधिवेशनको बन्दसत्र भने विराटनगर–९ जहदा रोडमा रहेको सिद्धी पार्टी प्यालेसमा हुनेछ ।
कोइरालाका अनुसार प्रदेश अधिवेशनको उद्घाटन नेपाली काङ्ग्रेसका केन्द्रीय सदस्य कृष्णप्रसाद सिटौलाले गर्नेछन् । अधिवेशनमा प्रदेशभरका करिब एक हजार सात सयभन्दा बढी प्रतिनिधिहरू सहभागी हुनेछन् ।
अधिवेशनमा प्रदेश १ का १४ जिल्लाका २८ सङ्घीय निर्वाचन क्षेत्रका क्षेत्रीय अध्यक्ष, सङ्घीय महाअधिवेशन प्रतिनिधि, प्रदेश निर्वाचन क्षेत्रका क्षेत्रीय अध्यक्ष, प्रदेश अधिवेशन प्रतिनिधिहरू, प्रदेशका केन्द्रीय सदस्यहरू र भ्रातृ तथा शुभेच्छुक संस्थाका प्रतिनिधिहरू सहभागी हुनेछन् ।
अधिवेशनका लागि खर्चमात्रै करिब एक करोड हुने अर्थ सङ्कलन समिति संयोजक एवम् मोरङ सभापति डिगबहादुर लिम्बूले जानकारी दिए । उनका अनुसार अधिवेशनमा सहभागि प्रतिनिधिबाट दर्ता शुल्क प्रतिव्यक्ति दुई हजारका दरले उठाइनेछ । सम्मेलनमा सहभागी प्रतिनिधिबाट ३२ लाख हाराहारी सङ्कलन हुने उनको भनाइ छ ।
