काठमाडौँ। रसुवामा आएको विनाशकारी बाढीमा सम्पर्कविहीन भएकाहरूको खोजी र पहिचानमा कठिनाइ भएको छ। बेपत्ताका आफन्तलाई पहिचानमा सहयोग पुगोस् भनेर महाराजगञ्जस्थित त्रिभुवन विश्वविद्यालय शिक्षण अस्पतालमा फेला परेका शवका तस्बिर सार्वजनिक गरिएको छ।
बाढीमा करिब ५ हजार मानिस सम्पर्कविहीन रहेको तथ्यांक छ। हालसम्म १ हजार ३ सयभन्दा बढी शव फेला परे पनि ९८ जनाको मात्रै पहिचान खुलेको छ। पहिचान हुन नसकेका शवको सनाखतका लागि अस्पतालले डिएनए परीक्षण प्रक्रिया अघि बढाएको छ। त्यसका लागि बेपत्ताका आफन्तको डिएनए नमुना संकलन भइरहेको छ।
विपद्को १२ दिन बितिसक्दा पनि आफन्तको अवस्थाबारे ठोस जानकारी नपाएपछि अस्पतालमा तस्बिर हेर्न र डिएनए नमुना दिन आउने परिवारको संख्या घट्दै गएको छ। कतिपय अवस्थामा क्षतविक्षत अंग मात्रै फेला परेकाले पहिचान झनै जटिल बनेको अस्पताल स्रोतले जनाएको छ।
विपद्पछिका सुरुआती दिनमा अस्पताल परिसरमा आफन्तको बाक्लो उपस्थिति र चहलपहल थियो। तर पछिल्लो समय उक्त संख्या घट्दै गएको छ। अस्पतालमा शव राख्ने पर्याप्त स्थान नभएपछि चितवन, कास्की, काठमाडौंलगायत विभिन्न जिल्लामा जमिनमुनि अस्थायी व्यवस्थापन गरिएको छ।
