काठमाडौं। नेपाली कम्युनिष्ट पार्टीका संयोजक पुष्पकमल दाहालले विपद् व्यवस्थापन तथा उद्धार कार्यमा सरकार असफल भएको टिप्पणी गरेका छन् । सुरुका दिनमा देखिएको सरकारी तत्परता क्रमशः कमजोर हुँदै गएको र उद्धारले अपेक्षित परिणाम दिन नसकेको उनले बताए ।
संघीय संसद् भवनबाहिर सञ्चारकर्मीसँग कुरा गर्दै दाहालले उद्धारमा प्रयोग भएका उपकरण, प्राविधिक विज्ञता र सुरुङभित्रको वस्तुस्थितिबारे प्रधानमन्त्रीले संसद्मा गलत जानकारी दिएको दाबी गरे । यस विषयमा सदनमा समेत बहस भएको उनले बताए ।
‘मैले संसदको रोस्टमबाटै पनि भनिसकेको छु, उद्धार कार्यमा सरकार सफल छैन । शुरुमा केही तत्परता देखिए पनि पछि यो फितलो हुँदै गयो । समग्रमा उद्धार कार्य मूलभूत रूपमा सफल हुन सकेन,’ दाहालले भने ।
उनले विपद्का बेला प्रधानमन्त्रीले सबै पक्षबीच सहकार्य र सहमतिको वातावरण बनाउनुपर्ने बताए । प्रधानमन्त्री सबैको साझा अभिभावक हुनुपर्ने भए पनि वर्तमान प्रधानमन्त्रीको कार्यशैलीमा त्यस्तो समन्वयकारी भूमिका नदेखिएको उनको भनाइ छ ।
सरकारले विपद्को समयमा जिम्मेवारीपूर्ण ढंगले काम गर्न नसक्दा नागरिकले सास्ती खेप्नुपरेको दाहालले बताए । उनले प्रधानमन्त्रीको नेतृत्वदायी भूमिकामाथि समेत प्रश्न उठाएका छन् ।
