काठमाडौं । प्रधानमन्त्री बालेन्द्र शाहले रसुवाको भोटेकोशी नदीमा आएको बाढीपछि उद्धार, राहत तथा विपद् व्यवस्थापनमा प्रदेश र स्थानीय सरकारको भूमिकाको प्रशंसा गरेका छन् ।
बाढी आएको छैटौँ दिनको पछिल्लो अवस्थाबारे फेसबुकमार्फत जानकारी दिँदै प्रधानमन्त्री शाहले संघीय सरकारलाई प्रदेश तथा स्थानीय तहबाट प्राप्त सहयोग र समन्वयले कठिन परिस्थितिमा विपद् व्यवस्थापन सहज भएको बताएका हुन् ।
प्रधानमन्त्रीका अनुसार बाढी प्रभावित क्षेत्रबाट हालसम्म ११ हजार ३७९ जनाको उद्धार गरिएको छ भने ९३९ जनाको शव फेला परेको छ । स्थानीय सरकारको सक्रियतामा ३ हजार ६९६ प्रभावित नागरिकलाई राहत सामग्री उपलब्ध गराइएको उनले जानकारी दिएका छन् ।
‘स्थानीय र प्रदेश सरकारको साथले गर्दा नै अप्ठ्यारो परिस्थितिमा पनि नागरिकको व्यवस्थापन सहज भएको छ,’ प्रधानमन्त्री शाहले भनेका छन् ।
उनका अनुसार प्रधानमन्त्री दैवी प्रकोप कोषमा हालसम्म ५ अर्ब ८७ करोड रुपैयाँभन्दा बढी रकम संकलन भएको छ । उक्त रकम पारदर्शी ढंगले विपद् प्रभावित नागरिकको हितमा प्रयोग गरिने प्रतिबद्धता पनि उनले जनाएका छन् ।
प्रधानमन्त्री शाहले सडक, विद्युत् तथा सञ्चार सेवा पुनःस्थापनामा भइरहेको प्रगतिबारे समेत जानकारी दिएका छन् । अब सरकारको प्राथमिकता उद्धार र राहतसँगै पुनःस्थापना तथा दीर्घकालीन विपद् व्यवस्थापनमा केन्द्रित हुने उनले बताएका छन् ।
हिमालय क्षेत्रमा जलवायु परिवर्तनका कारण यस्ता प्राकृतिक विपद्का घटना बढ्दै गएको उल्लेख गर्दै प्रधानमन्त्री शाहले यस विषयमा अन्तर्राष्ट्रिय समुदायको ध्यानाकर्षण गराउने समय आएको समेत बताएका छन् ।
