काठमाडौं । हालैको बाढी तथा प्राकृतिक विपद्का कारण प्रभावित नागरिक तथा परिवारहरूको उद्धार, राहत र स्वास्थ्य उपचारमा सहयोग पुर्याउने उद्देश्यले आर्या फार्माल्याबले नेपाल सरकारलाई आवश्यक औषधिहरू हस्तान्तरण गरेको छ।
कम्पनीले बाढी तथा विपद् प्रभावित क्षेत्रमा रहेका स्वास्थ्य चौकी तथा स्वास्थ्य स्वयंसेवकहरूका लागि आवश्यक पर्ने रु. ८,५१,७५० (आठ लाख एकाउन्न हजार सात सय पचास) बराबरको स्वास्थ्य उपचारसम्बन्धी औषधिहरू उपलब्ध गराएको जनाएको छ।
साथै, प्रभावित नागरिकहरूको स्वास्थ्य उपचारमा थप सहयोग आवश्यक परेको खण्डमा कम्पनीले उपचारका लागि चाहिने आवश्यक उपकरण तथा औषधिहरू उपलब्ध गराउने प्रतिबद्धता समेत व्यक्त गरेको छ।
विपद्को समयमा प्रभावित नागरिकहरूलाई आवश्यक औषधि तथा स्वास्थ्य सेवामा सहज पहुँच सुनिश्चित गर्न यो सहयोग गरिएको हो। स्वास्थ्य चौकी तथा स्वास्थ्य स्वयंसेवकहरूमार्फत प्रभावित समुदायसम्म यो सहयोग पुग्ने र राहत तथा पुनःस्थापनाका कार्यमा समेत सकारात्मक योगदान पुग्ने विश्वास कम्पनीले लिएको छ।
विपद्को यस कठिन घडीमा प्रभावित नागरिक तथा परिवारहरूप्रति ऐक्यबद्धता जनाउँदै आर्या फार्माल्याबले स्वास्थ्य सुरक्षाका लागि आवश्यक सहयोगमा निरन्तर साथ दिने प्रतिबद्धता व्यक्त गरेको छ।
