काठमाडौं । नेपाली कांग्रेसले विपद्का बेला सरकार तथा विभिन्न निकायबाट भइरहेका राहत, उद्धार र व्यवस्थापनसम्बन्धी कामबारे जनतालाई स्पष्ट जानकारी गराउन संसद्को बैठक तत्काल बोलाउनुपर्ने निष्कर्ष निकालेको छ ।
सोमबार सिंहदरबारमा बसेको कांग्रेस संसदीय दलको बैठकले संसद् सञ्चालनका विषयमा सभामुखसँग छिटो छलफल गर्ने निर्णय गरेको प्रमुख सचेतक बासना थापाले जानकारी दिइन् ।
उनका अनुसार जिल्लादेखि गाउँ–गाउँसम्म भएका बेपत्ता घटनाका विषय सांसदमार्फत संसद्मा उठाउन तथा समस्या समाधानका उपाय पहिल्याउन पनि संसद् सञ्चालन आवश्यक छ ।
बैठकले विपद्पीडितलाई राहत उपलब्ध गराउन कांग्रेसका सबै सांसदले आफ्नो आधा महिनाको पारिश्रमिक पार्टीको राहत कोषमा जम्मा गर्ने निर्णय गरेको छ । साथै, अत्यावश्यक पूर्वाधार तत्काल पुनर्निर्माण गरी प्रभावित क्षेत्रको जनजीवन सामान्य बनाउन सरकारसँग आग्रह गरिएको थापाले बताइन् ।
कांग्रेस सचेतक निष्कल राईले भने वास्तविक पीडित र आवश्यकतामा रहेका नागरिकले अझै प्रभावकारी रूपमा राहत पाउन नसकेको बताए । उनका अनुसार राहत सामग्री कतिपय स्थानमा थुप्रिए पनि वितरण प्रणाली प्रभावकारी बन्न सकेको छैन ।
सरकारले लागू गरेको एकद्वार राहत प्रणालीमा स्थानीय तहसँग पर्याप्त समन्वय हुन नसकेको पनि राईले बताए ।
त्यस्तै, बेपत्ता तथा मृतकको शव व्यवस्थापनमा समेत समस्या देखिएको उनले उल्लेख गरे । शव व्यवस्थापन संवेदनशील र जटिल विषय भएकाले आवश्यक उपकरणको व्यवस्था गर्न तथा पीडित परिवारको भावना र परम्परागत संस्कारलाई सम्मान गर्दै सुरक्षित र मर्यादित ढंगले व्यवस्थापन गर्न विज्ञको सुझाव लिएर अघि बढ्न सरकारलाई आग्रह गरिने राईले बताए ।
