काठमाडौं । गणेश नेपालीको आत्मदाहपछि मृत्यु भएको घटनाबारे गृह मन्त्रालयले छानबिन प्रक्रिया अघि बढाएको छ। घटनामा काठमाडौं महानगरपालिकाका नगर प्रहरीको भूमिकामाथि प्रश्न उठेपछि गृह मन्त्रालयले सम्बन्धित अधिकारीहरूसँग सोधपुछ सुरु गरेको हो।
प्रत्यक्षदर्शीहरूले नगर प्रहरीमाथि लापरबाही गरेको आरोप लगाएपछि गृहमन्त्री सुधन गुरुङले काठमाडौं महानगरपालिकाका नगर प्रहरी प्रमुख विष्णु जोशी र प्रमुख कार्यकारी अधिकृत सरोज गुरागाईंलाई आकस्मिक रूपमा मन्त्रालयमा बोलाएका छन्।
गृह मन्त्रालयका अनुसार घटनाको समयमा नगर प्रहरीको भूमिका, त्यसपछिको व्यवस्थापन तथा जिम्मेवारी निर्वाहको अवस्थाबारे अधिकारीहरूसँग जानकारी लिइएको छ। मन्त्रालयले घटनासँग सम्बन्धित सबै पक्षको तथ्य संकलन गरी निष्पक्ष छानबिन गर्ने र दोषी देखिए कानुनअनुसार कारबाही गरिने जनाएको छ।
गणेश नेपालीको आत्मदाह र त्यसपछि भएको मृत्यु घटनाले सार्वजनिक रूपमा चासो र बहस बढाएको छ। विशेषगरी घटनास्थलमा नगर प्रहरीको उपस्थितिसँग जोडिएका विषयमा विभिन्न प्रश्न उठिरहेका छन्। गृह मन्त्रालयको पछिल्लो कदमलाई घटनाको वास्तविक अवस्था पत्ता लगाउने र जिम्मेवारी निर्धारण गर्ने प्रयासका रूपमा हेरिएको छ।
