काठमाडौँ । महिला, बालबालिका तथा ज्येष्ठ नागरिक मन्त्रालयले महिला तथा किशोरीमाथि हुने लैंगीक हिंसाका घटना भएमा वा त्यस्ता घटनाबारे जानकारी प्राप्त भए तत्काल सम्बन्धित निकायमा सूचना दिन आग्रह गरेको छ।
आइतबार सार्वजनिक सूचनामार्फत मन्त्रालयले पीडित वा जानकारी राख्ने व्यक्तिलाई ढिलाइ नगरी उपलब्ध सहायता संयन्त्रमार्फत सम्पर्क गर्न अनुरोध गरेको हो।
मन्त्रालयका अनुसार लैंगीक हिंसासम्बन्धी घटनाका लागि नि:शुल्क हेल्पलाइन नम्बर ११४५ मा सम्पर्क गर्न सकिनेछ। साथै अस्पतालहरूमा सञ्चालनमा रहेका एकद्वार संकट व्यवस्थापन केन्द्र, नेपाल प्रहरीको आपत्कालीन नम्बर १००, बाल हेल्पलाइन १०९८ तथा मन्त्रालयका आधिकारिक इमेल र मोबाइल माध्यमबाट समेत जानकारी गराउन सकिने जनाइएको छ।
मन्त्रालयले हिंसाबाट प्रभावित व्यक्तिको उद्धार, परामर्श, सुरक्षा तथा आवश्यक सहयोगका लागि उपलब्ध सेवा संयन्त्र प्रयोग गर्न आग्रह गरेको छ।
त्यसैगरी लैंगीक हिंसामुक्त समाज निर्माणका लागि व्यक्ति, परिवार, समुदाय, सरकारी निकाय, निजी क्षेत्र, सञ्चारमाध्यम तथा सरोकारवाला संघ-संस्थाले आ-आफ्नो क्षेत्रबाट सक्रिय भूमिका निर्वाह गर्न मन्त्रालयले अपिल गरेको छ।
