काठमाडौँ । नेपाली काँग्रेसनिकट नेपाल विद्यार्थी संघ (नेविसंघ) ले सुकुम्वासी बस्ती हटाउने क्रममा वैकल्पिक प्रबन्ध नगरी सरस्वती आधारभूत विद्यालय हटाइएको विषयप्रति आपत्ति जनाएको छ।
संघका प्रवक्ता सुरज सेजुवालद्वारा जारी विज्ञप्तिमा करिब २१ वर्षदेखि सञ्चालनमा रहेको उक्त विद्यालय हटाइँदा २७५ विद्यार्थीको अध्ययन प्रभावित भएको उल्लेख गरिएको छ।
नेविसंघले विद्यालय हटाइएकाले त्यहाँ अध्ययनरत बालबालिकाको नियमित कक्षा सञ्चालन, सिकाइको निरन्तरता तथा शिक्षामा पहुँचमा प्रत्यक्ष असर परेको भन्दै चिन्ता व्यक्त गरेको छ। नयाँ शैक्षिक सत्र यही महिनाको २० गतेदेखि सुरु हुने तयारी भइरहेका बेला पर्याप्त विकल्पबिनै विद्यालय हटाइनु संवेदनशील विषय भएको संगठनको धारणा छ।
बालबालिकाको पठनपाठन कुनै पनि अवस्थामा अवरुद्ध हुन नदिन सम्बन्धित निकायले जिम्मेवार र संवेदनशील ढंगले व्यवस्थापन गर्नुपर्ने माग विज्ञप्तिमा गरिएको छ।
यसैगरी, प्रभावित विद्यार्थीका लागि तत्काल सुरक्षित स्थानमा विद्यालय सञ्चालनको व्यवस्था गर्न, अस्थायी कक्षा सञ्चालन गर्न, आवश्यक शैक्षिक सामग्री तथा शिक्षकको प्रबन्ध मिलाउन र विद्यालयलाई उपयुक्त स्थानमा स्थानान्तरण गर्ने प्रक्रिया अघि बढाउन नेविसंघले आग्रह गरेको छ।
साथै, सुकुम्वासी तथा सीमान्तकृत समुदायका बालबालिकाको शिक्षा दीर्घकालीन रूपमा प्रभावित नहोस् भन्ने उद्देश्यले आवास, पुनर्स्थापना र शिक्षा क्षेत्रलाई समेट्ने एकीकृत नीति, स्पष्ट योजना तथा प्रभावकारी कार्यान्वयनसहितको दीर्घकालीन समाधान अवलम्बन गर्न स्थानीय र संघीय सरकारको ध्यानाकर्षण गराइएको छ।
