काठमाडौं । नेकपा एमालेका नेता ईश्वर पोखरेलले पार्टीका पूर्वअध्यक्ष मनमोहन अधिकारीलाई प्रतिकूल परिस्थितिमा पनि सिद्धान्त र निष्ठाबाट विचलित नहुने नेता भएको बताएका छन्।
नेकपा एमालेका पूर्वअध्यक्ष तथा नेपालका प्रथम कम्युनिष्ट प्रधानमन्त्री अधिकारीको २७औँ स्मृति दिवसका अवसरमा आयोजित कार्यक्रममा बोल्दै पोखरेलले उनको राजनीतिक संघर्ष, त्याग र योगदानको स्मरण गरे।
उनले मनमोहन स्मृति प्रतिष्ठान स्थापना तथा विस्तारमा योगदान पुर्याउने दिवंगत व्यक्तित्वहरूलाई सम्मानपूर्वक सम्झँदै पूर्व सचिव हरिप्रसाद शर्मा काफ्ले, गोविन्द गजुरेल, डा. गोविन्द थापा र लक्ष्मीदास मानन्धरको योगदान उल्लेख गरे।
पोखरेलले मनमोहन अधिकारी नेपाल कम्युनिष्ट पार्टी स्थापना हुनुअघि नै आन्दोलनमा सक्रिय रहेको बताए। भारतमा रहँदा उनी भारतीय स्वतन्त्रता आन्दोलनमा सहभागी भई जेलसमेत बसेको स्मरण गर्दै उनले अंग्रेज शासन अन्त्य नभएसम्म नेपालमा राणा शासनको अन्त्य कठिन हुने अधिकारीको धारणा रहेको उल्लेख गरे।
नेपाल फर्किएपछि पनि अधिकारीले जेल जीवन र यातना भोग्नुपरेको तर कहिल्यै आफ्नो सिद्धान्तसँग सम्झौता नगरेको पोखरेलले बताए।
हेलिकप्टर दुर्घटनापछि गम्भीर स्वास्थ्य समस्या झेले पनि अधिकारीको आत्मबल कमजोर नभएको उल्लेख गर्दै पोखरेलले भने, “बैशाखी टेक्नुपरे पनि उहाँले हार मान्नुभएन। उहाँ भन्नुहुन्थ्यो— मेरा दुई खुट्टा थिए, अब चार वटा भएका छन्, म अझै हिँड्न सक्छु।”
वर्तमान राजनीतिले मनमोहन अधिकारीको जीवनबाट कठिन समयमा पनि सिद्धान्त र निष्ठाको झण्डा नझुकाउने पाठ सिक्नुपर्ने पोखरेलको भनाइ थियो।
