बिर्तामोड, १४ असोज । झापाको बिर्तामोड नगरपालिका-१० ठुटेबरमा हिजो बेलुका भएको दुर्घटनामा घाइतेमध्ये एक जनाको निधन भएको छ ।
आइतबार बेलुका ८:३० बजे बिर्ता बजारबाट सैनिकबजार तर्फ जाँदै गरेको प्रदेश १-०१-०१२ प ५८९१ नम्बरको मोटरसाइकलले विपरीत दिशाबाट आउँदै गरेको साइकल यात्रीलाई जोगाउने क्रममा आफै अनियन्त्रित भई दुर्घटना भएको थियो ।
उक्त दुर्घटनामा मोटरसाइकल चालक बिर्तामोड नगरपालिका-१० बस्ने वर्ष २७ को अनिस न्यौपाने र मोटरसाइकल पछाडि सवार सोही स्थानका ३८ वर्षीय टिकाराम राय घाइते भएका थिए ।
घाइते दुवैको बीएण्डसी अस्पतालमा उपचार भइरहेकोमा टाउकोमा गम्भीर चोट लागेका मोटरसाइकल चालक न्यौपानेको आज दिउँसो निधन भएको जिल्ला प्रहरी कार्यालय झापाका प्रवक्ता प्रहरी नायव उपरीक्षक कृष्ण कुमार चन्दले बताए ।
